Kachin Ralzaam Cheukhat Nih An Zaam Lio I Harnak An Tonmi Kong An Chim

Kachin ralzaam

Mi tampi nih Myanmar ram chung hmun tampi ah Thingyan puai nuam takin an lawmh lio ah Kachin ram ahcun mi tampi cu ral ruangah an inn le lo zaam takin an nunnak caah himnawk khawl in an zaam.

Kawl ralkap le KIA cu ke in siseh, vanlawng le miakpi hmangin faktuk in an i doh caah Kachin ram mipi 6,100 leng nih an inn le an lo an zaam tak.

Ralzaam chungah harsatnak tambik a ingtuarmi hi Kachia state, Danai peng i Aung Lawt khuami pawl an si hna. An zate minung 2,000 leng an si.

N Jang Yang, Chipwi, Waimaw le Mogaung peng in a zaami ralzaam pawl cu ralzaam riahbuk ah an i dor kho colh. Asinain, Aung Lawt khuami pawl cu an zaam pahin ramtang ah ni 20 chung tihal le rawlttam in an i tap.

Danai peng ral kut chungin luatnak caah U In San Aung Lat (kum 62) cu a chungkahr le a hawile he an ke bakin tupi le vui hrang le cakai tampi umnak lungkua le tlang tan in an rak zaam.

U In San Aung ke 2 cu a zaamnak ah an hma dih.

“Ka nunnak ah a harbik lio caan cu kan rak zaam lio caan kha a si. Mah lio kha ruahtthan ka duh ti lo, ka ruah paoh ah ka ttap hnik,” tiah U In San Aung Lat nih a chim.

Aung Lawt khua pawngah bomb puah thawng an theih April 11 khuamui lai ah U In San Aung nih a nupi, a fale 4 (kum2, kum 4, kum 14 le kum 16) cu cawleng in ramlak lei ah a rak zaampi hna.

“Kan zaam lai ah facang, hmanphek, chiti le kan fale thilpuan i ken awk ah kan nu ka timhtuahter. Keimah cu kaa hruk liomi dah ti lo thil zeihmanh kaa ken lo,” tiah U In San nih a chim.

U In San Aung Lat cu a hawipa chungkhar minung 9, cun a rianttuan ttihawi minung 11 he tiin an zate minung 26 tiin an rak zaam tti hna.

“Kan zaam ka in harnak kan tong colh. Zaan ah ruah a sur. Cangvut nih a kan seh pah. Lam a um lo caah kanmah nih vah chom a hau. Nu hna nih an fale thil an phurh pinah an fale an puak pah hna,” tiah U In San nih a chimchap.

U In San Aung le a hawile pawl cu ramtang le tuhmawng lakah muka pakhat te an zar i cu tang ahcun an zate in an it hna. Ni a hung sau deuh tikah an i kenmi rawl nih a dih tak thluahmah hna. A hnu ahcun rawl eiawk an ngei ti lo i ngakchia cu kalnak tha zong an ngei ti lo. An pale nih zeiti awk hngalh lo ah kal dingin an hro hna.

“Lam kan tlau pahin kan ti a hal tuk. Zaan ahcun ti a umnak hmun kan kawl i kan it. Ti dinawk kan ngeih lo caan hi a har bik. Ti dinawk cerhti kan hmuh lo ahcun vui pawi an i bualh nak tidil ti kha kan hni (longyi) in kan thianter hnu ah ngakchia pawl kan pek hna,” tiah U In San Aung Lat nih a chim.

U In San Aung Lat cu ka fale an um timi lungtthawnnak he hmai a nor i an zaam a ni 14nk (April 26) ah Hpakan peng, Dunban khuate an phan.

“Dunban khua kan phak ka ah ralkap nih zeitin dah nan rak zaam tiin a kan hal sual lai tiin ka thinphang tuk. Asinain, zarh khat hrawng kan um hnu cun ka hnangam ngai cang,” tiah U In San nih a chim.

Leave a Reply

Your email address will not be published. Required fields are marked *