Justin Bieber and Hailey Baldwin tthitum puai an tuah cang lai

Justin Bieber and Hailey Baldwin tthitum puai an tuah cang lai

Justin Bieber le a nupi Hailey Baldwin cu a ra laimi Nikhatni ahkhin US ram i nuamhnak minthang ‘Montage Palmetto Bluffs’ ah tthitum puai an tuah hnik.

Puai tuahnak hmun ngeitu cu a hlan khan in thawng an thanh cia i Zarhpini chun hnu in Nihnih tiang hmun tampi cu Justin Bieber te puai tuahnak ah zuahpiak a si lai.

Aho hmanh area chung luhnak nawl zong kan pe hna lai lo tiah hmun ngeitu nih thawng an thanh.

Nuamhnak hmun cu a ningpi dengmang in Justin Bieber te puai tuahnak caah an hman lai. BBQ restaurant zong an puai lai zaan khual donnak caah an hman lai.

Nuamhnak hmun i spa le tilionak le pawngkam khaan vialte cu Kendall Jenner le Hailey a ttang le le minthang pawl nih an umnak lai.

Sinain, Hailey a ttang Alec le Hailey a pa cu liamcia kum tlawmpal chung kha zapi theih in an i sik len caah atu hi an puai ah a rat lai a fiang rih lo.

Puai ah sawmmi pawl cu Zarhpini ah nuamhnak hmun (puai tuahnak hmun) an phan thluahmah hna lai i zaanriah ei hlan ah hotel ah an i tthum hna lai.

Nikhatni ah, nuamhnak hmun chung um biakinn pakhat ah Justin le Hailey cu ‘Pathian sin biakamnak’ an tuah lai.

An puai ahcun minung 185 an sawm hna, an hawikawm minthang deuh lawngte an si lai tinak a si.

Liamcia caan ahkhan Hailey nih kan biaknak phung tein puai tuah a biapituk a rak ti bal.

Justin Bieber le Hailey Baldwin cu 2018 September 13 ahkhan an rak i um cang nain, puai an tuah bal rih lo. – Daily Mail

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.