Israel ram, Jerusalem khuapi ah tuni ah Palestine muslim pa nih Israel pawl meithal le namte in a kah sam hna i minung 1 a thi, adang 3 hliam an tuar.
A thimi cu a thih hlan ah sizung an phakpi manh ko nain alu hma fah tuk caah chanh khawh loin a nunnak liam. Hliam tuarmi 3 lakah 2 cu palik an si. An nunnak caah ṭihnung asi lo.
“Automatic meithal aa putmi ralhrang pakhat nih Jerusalem Khua Hlun ah mipi a kah hna. Ralhrang cu palik nih kan fimṭawl/thah cang,” tiah Israel palik nih thawng a thanh.
Khua Hlun hi Jerusalem khua nichuahlei ah ummi sang asi. Kum 1967 ah Israel le innpa muslim ram pawl ni 6 chung ral an i tuk lio ahkhan Palestine kut in a lak (chuh) mi asi. Palestine pawl nih ‘hmailei kan khualipi ding asi’ an ti pengmi asi.
US President hlun Pu Donald Trump nih ‘Jerusalem cu Israel khualipi asi tiin kan pom cang…’ tiin thawng a rak thanhmi kha cu Jerusalem Nitlaklei (West Jerusalem) asi. Nitlaklei hi Israel cozah zung pawl an umnak asi. Jerusalem Nitlaklei zong hi Jordan ram nih a rak ukmi si nain kum 1948 i Israel le Arab ral lio ah Israel nih a lak i nihin tiang a ukmi si.
Khua Hlun ahhin Palestine (muslim) lawngte an um nain kum 1967 ral lio ah Israel nih a lak i nihin tiang a uk peng. Khua dang ummi Israel (Judah mi) pawl a hung ṭhial thluahmah hna.
Khua Hlun ah a hung peemmi pawl nih cun Palestine pawl inn le hmun an chuh peng hna caah le Israel cozah nih dantat loin a bawmh lehlam hna caah Palestine pawl an thinhung tuk i atu bantukin buainak a chuak lengmang.
Israel nih Khua Hlun a uk pengmi le hmun dang um Judah mi pawl a ṭhialter hna i Palestine pawl an pawnchuah pengmi hna cu UN, EU le ramdang pawl nih an mawhchiat peng i ngol dingin an auhawnh peng nain Israel nih zei a rel piak hna lo.
Nithumni zong ahkhan, Khua Hlun ahhin Palestine tleirawl pakhat nih namte in palik a sawh hna i palik 2 hliam an tuar. Palik nih an kah thah.
September thla dongh lai zongah, Palestine nu nih namte in palik sawh a timh hna lio ah palik nih an kah thah.
