Jenevy Sui: Ramdang ummi nih nan fale Lai holh le Lai nunphung chim hna uh

Chinmi nih kan ngeihchun aw ṭha minthang tlawmte lakah aa tel vemi Jenevy Sui nih, “Ka Lai holh peimi hi ka theithiam hraam uh, ramdang ummi nih nan fale hi Lai holh le Lai nunphung philh lo dingin chim hna uh,” tiah a chim.

Laimi cheukhat nih ‘na holh a pei …’ tiah a phunphun in mi zapi hmai FB ah an soisel pengmi cu Jenevy Sui nih holh lo tein kum tampi chung aa in peng hnu, tuni ah a official FB page ah avoi 1nk bik fianternak a hung tuah i atu bantukin a chim hi si.

“Voi tamtuk an ka soisel cang caah atu hi avoi 1nk bik le a donghnak bik fianternak ka tuah si lai” ati.

Jenevy Sui

“Chinmi hi Tlang Holh (Chinmi dihlak nih thiammi holh) kan ngei lo.

“Chinmi le Chinmi kan i ton zongah kan holh aa khah lo caah Kawl holh in kan i chawn. Ramdang phan Chinmi cu Mirang holh in an i chawn.

“Kei zong ka pa hi Thantlang peng, Zophei tlang i Aibur khuami asi i a nuhrin cu holh cu Zophei holh asi.

“Ka nu hi Chin ramkulh thlanglei Paletwa peng, Rimawa khuami asi i anmah holh cu Khumi holh asi.

Jenevy Sui

“Ka nulepa zong an rak i ton lio le duh lio ahhin an holh aa khah lo caah Kawl holh in an i chawn.

“Ka pa hi vuanṭhan asi caah aa ṭhial lengmang i hnu ahcun Yangon a phan.

“Keimah hi ka ngakchiat tein Yangon ah a ṭhangmi ka si. Inn ah zapi thiammi Kawl holh kan hmang.

“Cutin hlasa ka hung si tikah ‘Chinmi nih thazaang an ka pek caah si’ tiin Chin hla sa kho dingin ka rak zuam.

“Chin hla (Lai hla) sa kho dingin aa ka forhfial tu le chimtu Chin hla phuah thiam minthang Herh Lian cungah kaa lawm tuk. Amah nih aa ka chimh thawngin Lai hla tampi ka hung sa kho deuh i Lai holh zong ka hung holh kho deuh.

“Nain, ka holh pei nak zawn tete zong um pinah ka hngalh lomi biafang zong tampi um. Atutiang hi ka cawng peng rih i atu hi ‘thiam bantuk, pei bantuk,’ ka si. Kaa pei termi le zei rel loin ka holhmi asi lo.

“Ka thiam bak lo caah ka si khawh chungin kai zuam i ka holhmi te asi. Comment ah aa ka soiseltu zong nih ka theithiam hraam u.

“Nannih zong ramdang phanmi nan si caah fa nan ngeih ahcun Chin holh le Chin nunphung (Lai holh le Lai nunphung) an philhnak hnga lo chimh khawh i zuam uh.

Jenevy Sui

“Chin a simi paoh (Tedim, Kanpetlet, Paletwa, tbk zong) nih Lai holh (Hakha/Thantlang holh) an thiam hrimhrim awk si ti cu sullam um lomi si.

“Chinmi ciocio hmanh kan holh aa khat hna lo si… Atu hin Chin asi ko nain Chin holh naal tein a chim kho lomi keimah lawng ka si lo. [Soiseltu pawl] nan hmuhnak kau deuh hraam seh,” ati.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...