A pin taktakmi Hagibis Thlichia nih Japan ram a den caah minung 70 leng an thi cang. Minung 12 leng an tlau rih. Tuni zong mikhamhtu pawl cu a tlaumi an kawl peng ko hna.
Hagibis Thlichia nih thlichia pin taktak le ruahpi tuk taktak in Zarhteni zaan ahkhan Japan ram a den caah hmun tampi ah vawlei an min i tiva tlang an i baoh dih.
Hagibis Thlichia nih suimilam 1 ah 216km a phan khomi, a pin taktakmi thlichia in Japan ram cu a den ko nain, aa rat pimi ruahpi tuk taktak nih hin rawhralnak fak khun a chuahter.
Japan thawngzamhnak TV NHK nih “minung 72 an thi cang i 12 leng an tlau rih,” tiah tuzaan ah a thanh. Cozah nih a thanh ning ahcun an tlawm deuh nain ‘thawngpang tling asi rih lo’ ati.
Japan cozah hruaitu Prime Minister Shinzo Abe nih, “biatak tein mi kan kamh cuahmah rih ko hna lai,” tiah thawng a thanh. Hartong mipi khamh dingin ralkap, meithat, rili vengtu le palek 110,000 leng a thlah hna.
“Atu hi a rawhnak hmun pawl ah din loin mitlau kawl le khamh rian kan ṭuan cuahmah lio asi,” tiah Pu Abe nih Hlutdaw MP pawl a chimh hna.
“Tiva an liamnak hmun pawl ah, tiva tlang aa baohnak zawn kan phih cuahmah i tilian nih a khuhmi hmun pawl cu ti reu dingin seh in kan dawp cuahmah,” ati.
Prime Minister Zung nih, “thlichia le tilian nih a dennak hmun um minung 3,000 leng kan khamh khawh cang hna,” tiah a thanh.
Japan ram ahhin peng (prefecture/state) 47 a um. Tutan thlichia nih hin peng 36 bak a den.
Ralkap a tuan cuahmahmi thazaang lawng a zaat ti lo caah Ralkap Vuanci Zung nih ‘kenret’ aa chiahmi ralkap (reserved troops) a zaza zong a auh hna. 2011 ah lihnin le tsunami tilian a rak tlun hnu in tutan hi avoi 1nk bik kenret ralkap an auh hna asi.
Siangpahrang chungkhar an lungrawk tuk
Japan ram pumpi a uktu Siangpahrang Naruhito le Siangpahrangnu Masako cu hartongmi tampi kong ruat in an ngaihchia tuk hringhran, tiah Siangpahrang Inn nih a thanh.
“Siangpahrang nuva nih a nunnak liammi vialte nan ngaihchiatnak an in hrawmpi hna… cun a tlaumi zong a tuanh khawh chung tuan ah hmuh khawh hna dingin an i ruahchan,” tiah a thanh.
Mahtluk puicimh an tong nain, cozah nih October 22 ah tuah dingin a timh cangmi Naruhito siangpahrang ṭhutden peknak puai cu an leet lo.
Charhchan: CNA
