Israel Prime Minister Benjamin Netanyahu nih tuni ah Iran ralrin a pek colh.
Israel Prime Minister nih, “kan nunnak lak ai timmi doh dingin fek tein kan dir. Lungṭhawng taktak le ralkap thazaang he kan dir. Israel a kan kapmi paoh cu an ruah phak lo tiangin an tuar lai,” tiah Jerusalem ah tuahmi conference ah a chim.
Iran nih tu zingka dei hlan ah missiles zun 22 in Iraq i US ralkap an umnak sakhan 2 a kah hnu ah Israel Prime Minister nih Iran ralrin a pek hi si.
US nih kan hnu zarh ah Iran ralkap bawi a thah ruangah Iran nih US a lehrulh i Israel a tlerh.
Iran nih cun “kan missiles nih US ralkap 80 a thah hna, hnu ah Israel ka kah ve lai” ati. Nain US cozah nih “kan ralkap a thimi an um lo” ati.
PM Benjamin Netanyahu nih, “US nih a thahmi Iran ralkap bawi Qassem Soleimani cu sualnak ngei lo mi sawhsawh rel cawk lo a thattu pa asi. Ram tampi daihnak hrawktu, kum hrabu tam tuk chung tihnak, ngaihchiatnak le lungfahnak thlaici a vorhtu pa asi. Mah pinah, mah bantuk cu tam chinchin in tuah ai tim rihmi pa asi.
“Iran nih Middle East le vawlei cung hmun zakip ah ralhrang thlahtu ah a hmanmi ralhrang-bawipa cu President Trump nih rianrang, ralṭha le sullam ngei tein a lehrulh caah President Trump hi kan lawmh awk asi.
“Mah kong ahcun Israel nih fek tein US kan dirpi. America nih Israel nakin a ṭha deuhmi hawikom a ngei lo. Israel zong nih America nakin a ṭha deuhmi hawikom kan ngei lo,” ati.
Charhchan: Times of Israel
