Iran nih missiles in US Ralkap umnak hmun 2 a kah hnu ah ‘vawleipi’ nih hitin bia a chim

- Advertisement -

US Ralkap an umnak Iraq ralkap sakhan 2 cu Iran nih missiles tampi in tu zingka dei hlan ah a kah, tiah US Ralkap Zung Lubik (Pentagon) nih thawng a thanh.

Iran media cheukhat nih cun “American 80 leng an thi” an ti nain US President Trump le Pentagon nih cun “atutiang kan check hlat khawh tawk ah kan ralkap a thimi an um lo” an ti.

A kahmi sakhan 2 cu;

  • Anbar state um Ain al-Assad sakhan le
  • Iraq ram chaklei i Erbil airport pawng um sakhan pakhat an si. US nih kan ralkap bawi Qassem Soleimani na thah ruangah kan in lehrulhmi asi, tiah Iran nih a chim.
Erbil sakhan – 2018 hmanthlak

US President Donald Trump nih Nithumni zingka (Washington caan) ah mah kong cu thawngthanhnak ka tuahte lai, ati.

US le Iran kar huatnak a karh chin caah, vawlei cung ram tampi cozah pawl nih atanglei bangin bia an chim thluahmah cang.

Al-Asad sakhan – 2018 hmanthlak

Iraq

Iraq ralkap nih, “Iran missiles ruangah kan ralkap aa hliammi le a thimi an umlo,” tiah a chim.

“Tu zingka dei hlan 1:45am le 2:45am kar ah Iran nih missiles 22 in Iraq ralkap sakhan 2 a kah. Missiles 17 cu Ain al-Assad sakhan ah an tla. 2 cu an puak lo. 5 cu Erbil pawngum sakhan ah an tla,” ati.

Poland

Iraq um Poland ralkap hliamh an tong lo, tiah Poland Ralkap Vuanci nih a chim.

“Iraq um kan ralbawi he kan i pehtlai peng ko,” tiah Mariusz Blaszczak nih a chim.

Britain

“Britain ralkap telh in US hruaimi ramdang ralkap phu an umnak Iraq ralkap sakhan 2, Iran nih missiles in a kahmi hi kan cohlang hrim lo,” tiah Ramdang Vuanci Dominic Raab nih a chim.

“Hi bantuk ruahsetmat lo le ṭihnung thil hi tuah ti lo dingin le daihnak kawl dingin Iran kan forhfial,” ati.

Norway

Iran nih missiles in Iraq um Al-Asad ralkap sakhan a kahmi ruangah Norway ralkap aa hliammi le a thimi an um lo, tiah Norway ralkap biachimtu nih a chim.

Mah sakhan ahhin Norway ralkap 70 hrawng an um, tiah Norway ralkap headquarters in Byrnjar Stordal nih a chim.

Japan

Japan cozah nih ‘cozah 2 karlak ah daihnak lenter dingin nan si khawh chungin i zuam uh’ ati hna.

Prime Minister Shinzo Abe cu tu zarhdongh hi Saudi Araba, UAE le Oman ah tlawn aa tim nain Iran nih missiles in Iraq um US ralkap a kah hna ruangah aa let.

Japan Chief Cabinet biachimtu Yoshihide Sufa nih, “Middle East um kan rammi pawl an himnak hnga cozah nih thawngpang kan hlat lai i aa pehtlaimi cozah pawl kan pehtlaih hna lai,” ati.

“Mahka area rili ah a kal liomi Japan tilawng le zinan phor pawl an himnak hnga Japan ralkap tilawng kan thlah lai,” ati.

Australia

Prime Minister Scott Morrison nih, “Iraq um kan ralkap le palai pawl cu an him ko,” tiah a chim.

Iraq ah Australia ralkap 300 hrawng an um.

Pu Morrison nih, “Nihnih ah President Trump he Australia meikang kong phone kan i chawnh lio ah Iraq um kan ralkap himnak kong zong kan ceih. An himnak hnga US nih a si khawh chungin a tawlrel,” tiah a chim.

The Philippines 

Iraq um Philippines rammi vialte nan duh/lo zongah a rannak in chuak dih uh, tiah ramdang vuanci zung nih tuni ah a thanh.

Iraq ah rian a ṭuan kan rami 1,600 hrawng an um. Acheu fai cu Iraq chaklei i Kurdish pengah le Baghdad um US zung pawl ah an um, ati.

Philippines nih France ralkap sin in a cawk tharmi Rili Vennak Ralkap Tilawng cu Philippines lei ah a kal lio si nain, Middle East in chuah a duhmi kan rammi pawl va khamh hna tiah lam tanṭim in Oman le Dubai lei ah an kalter.

“Ramleng rianṭuan Philippines rammi pawl cu a himnak tilawng dinhnak ah kan chiah hna lai i a herh cun cuka ah helicopter in kan lakte hna lai,” tiah Rili Vennak Ralkap nih a thanh.

Ralkap Vuanci Delfin Lorenzana nih, “Iraq le Iran um kan rammi pawl laknak ah vanlawng kan timh lio asi. A duhmi cu inn ah kan tlunpi hna lai, a duh lomi cu a himnak hmun ah kan ṭhial hna lai,” tiah zahan ah a chim.

Philippines rammi 2.3 million hrawng hi Middle East ah sinum, engineer, inn sak le nurse an ṭuan.

Pakistan 

Iraq tlawn aa timmi kan rammi pawl ralring taktak in um uh, ati.

“Iraq ah a ummi kan rammi paoh Baghdad um Pakistan Tanzung he i pehtlaih khawh peng dingin um uh, atu Iraq tlawn aa timmi nan um cun i ralring taktak uh,” ati.

Denmark 

Denmark Ralkap nih, “Iran nih missiles in Iraq um Al-Asad sakhan a kahmi ruangah Denmark ralkap aa hliammi le a thimi an um lo,” ati.

Iraq le Syria ah ISIS ralhrang do dingin Denmark nih a ralkap a rak thlah ve hna. Ramdang zong nih an thlah cio hna. Mah pawl cu US ralkap le Iraq ralkap nih an hruai hna.

Al-Asad sakhan ahhin Denmark ralkap 130 hrawng an um ve.

India

India cozah nih “thawng kan in thanh ṭhan hna hlan chung paoh cu kan rammi pawl a herh tukmi dah ti lo ahohmanh Iraq tlawng hlah uh,” ati.

“Iraq ram ah a um liomi pawl zong ralring tein um ulaw vak len hlah uh,” ati.

New Zealand

New Zealand acting prime minister Winston Peters nih Iran le US entainak a karhmi cungah a lungṭhat lonak a langhter.

“Atu hi i sum le daihnak sere caan asi, ralkap thazaang hmang loin ramkhel in daihnak kawl caan asi.

“Iraq um New Zealand ralkap pawl cu an dihlak in an him ko,” ati.

Iran nih missiles in a kahmi Iraq ralkap sakhan 2 ahhin New Zealand ralkap 50 hrawng an um ve.

“New Zealand ralkap tam deuh cu Camp Taji sakhan ah an um. Mah sakhan cu Iran nih a kap lo,” tiah Peters nih a chim.

Follow US

102,157FansLike
53FollowersFollow
734SubscribersSubscribe

Ṭial Tharmi

Chin Ralzaam caah FREE in Cancer Zawtnak Thlop Khawh Si Cang

A ra laimi October thla ah UNHCR card/catlap le community card a ngeimi ralzaam pawl hna caah Alliance of Chin Refugees (ACR)...

Vum Thu Maung certual sakmi 65% an lim cang

Chin khualipi Hakha um Vum Thu Maung Certual i puai zohtu mipi ṭhutnak cu Chin State Cozah budget ting thong 6 le...

Kawlram ah Covid-19 zawtnak ngei hmuhmi 9,000 leng an si cang

Ngandamnak Vuanci Zung nih tuzaan sml 8 i thawngthanhnak a tuahmi ah Covid-19 zawtnak ngei hmuhmi 9,112 an si cang.

Malaysia ah Covid-19 mizaw thar 111 an hmuhchap hna

Tuni Malaysia ram ah Covid-19 zawtnak ngeimi 111 an hmuhchap hna. Zarh khat chungah mizaw a zaleng an hmuh hna hi voi...
- Advertisement -