17.5 C
Hakha
Thursday, January 21, 2021

COVID-19

Vawleipumpi
97,353,873
A zawmi
Updated on January 21, 2021 8:30 am
Vawleipumpi
2,084,498
A thimi
Updated on January 21, 2021 8:30 am
Vawleipumpi
69,693,025
A dammi
Updated on January 21, 2021 8:30 am

Iran nih missiles in Iraq um US ralkap a kah hna

Advertisement

Tu zingka dei hlan ah, Iran nih missiles tampi in Iraq i US Vanlawng Ralkap an umnak sakhan 2 a kah, tiah US Ralkap nih thawng a thanh.

Kan hnu zarh ah US nih Iran ralkap bawi Qassem Soleimani a thah ruangah Iran nih kan lehrulhmi asi, tiah Iran cozah nih a thanh.

Donald Trump nih president a ṭuan chungah tutan hi US nih ramdang ral fakbik a ton asi.

Iran media cheukhat nih “American 80 leng an thi” an ti.

Nain, US cozah nih “atutiang kan check khawh tawk ahcun US ralkap a thimi le aa hliammi an um rih lo, tling deuh in kan check cuahmah lio asi,” tiah a chim. Iraq ralkap bawi nih, “kanmah Iraq ralkap zong aa hliammi le a thimi an um lo,” tiah a chim ve.

“1:45am le 2:45am kar ah missiles zun 22 in Iraq a kan a kah. Missiles nih cun US le Iraq ralkap an um ṭinak sakhan pawl an khen,” tiah Iraq ralkap nih thawng a thanh.

Anbar province um Ain al-Assad vanlawng ralkap sakhan le Iraq chaklei i Erbil airport pawngum vanlawng ralkap sakhan a kah hna.

President Donald Trump nih, “A ṭha dih ko! Iran nih Iraq um ralkap sakhan 2 missiles in a kah. Hliam tongmi le a rawkmi kan check hlat lio asi. Atutiang cun, thawngpang ṭha ko,” tiah Twitter ah a ṭial.

“Vawlei cung khuazei hmun paoh ah let tampi in ralkap ṭhawngbik le hriamnam ṭha bik kan ngei! Thaizing zingka ah thawngthanhnak ka tuahte lai,” ati.

Iran nih, “Iraq um US ralkap vialte kir dih hna seh. US nih a kan lehrulh ahcun hi nak let fak in kan lehrulh ṭhan lai. Middle East um US ralkap vialte nih an tuar lai,” ati.

Zei ruang dah Iran nih US ralkap a kah hna

Iran cozah nih aa bochan bikmi a ralkap bawi Qassem Soleimani cu kan hnu zarh ah President Trump nawlpeknak in US ralkap nih Iraq khualipi Baghdad ah drone in an kah thah.

Iraq um US ralkap a zaza a thah cang hna pinah adang tampi thah a timh rih hna. Iraq khualipi Baghdad um US Tanzung mei duah dingin a tukforhtu hna zong amah hi si. Mah ruangah kan thahmi si, tiah US nih ati.

Iran a thinhung tuk. Iran hruaitu lubik Khamenei nih, “US cu fak taktak in kan lehrulh lai” tiah vawleipi theih in a rak chim colh.

Ralbawi ruak cu Iran mipi tam taktak nih an thlah i “Death to America” tiah an au pah hna, an ṭap pah. Lam an i tlum lo caah an i pah hna i minung 40 leng an thi. Iran ralkap tam taktak nih ruak an thlah ve.

Iran mipi le cozah nih an i bochan tukmi Iran ralkap bawi US nih a thah ruangah atu bantukin Iran nih missiles in Iraq um US Vanlawng Ralkap sakhan 2 a kah hi si.

- Advertisement -

Bawmh Khawh Kan Si

The Chin Express cu kan Chin mipi caah free tein ni fatin thawngpang dik thanh aa zuam pengmi kan si. Kan rianṭuannak ah bawmh a kan duhmi nan um cun, thla 1 $5 tein bawmh khawh kan si.

Ṭial Tharmi

Ṭial Tharmi

COVID-19

Vawleipumpi
97,353,873
A zawmi
Updated on January 21, 2021 8:30 am
Vawleipumpi
2,084,498
A thimi
Updated on January 21, 2021 8:30 am
Vawleipumpi
69,693,025
A dammi
Updated on January 21, 2021 8:30 am
- Advertisement -