Tu zingka dei hlan 1:45am in 2:45am kar ah Iran nih missiles zun 22 in, US le ramdang ralkap an umnak Iraq ralkap sakhan 2; Al Asad vanlawng ralkap sakhan le Erbil sakhan a kah hna. Atutiang thawngpang kan theih khawh tawk ahcun;
A thimi an um lo – US ralkap nih “US ralkap a thimi an um lo,” tiah a chim. “Nain, missiles nih a sakhan zei tluk dah a hrawh ti cu kan check lio asi” ati. US ralkap he aa bawmmi Iraq ralbawi nih “kanmah Iraq ralkap zong a thimi an um lo” ati.
Iran media cheukhat nih cun “American 80 leng an thi” tiah an ṭial len nain atutiang rinhtlak hramfek in kan theih khawh tawk ahcun a thimi an um lo. President Trump zong nih “an him dih ko” tiah Twitter ah a tial.
Iran nih a kah hlan ah Iraq thawng a thanh – Iran nih missiles in sakhan 2 a kah hlan ah an kaa in Iraq thawng a kan thanh, tiah Iraq cozah nih a chim.
“Mah sakhan pawl cu missiles in kan kah lai caah nan ralkap la dih hna uh a kan ti. American le ramdang ralkap pawl zong cu kan chimh ve hna i vawlei tang a himnak bunkers chungah an i thup manh ve,” tiah Iraq cozah nih a chim. US cozah riantuan zong nih a fehter.
Iran nih a kahnak aruang – Kan hnu zarh ah US nih Iraq khualipi Baghdad ah Iran ralkap bawi Qassem Soleimani cu drone in a kah thah ruangah Iran mipi le cozah an thinhung i atu bantukin an lehrulhmi asi.
US nih zeitin dah a leh lai – Mah hi cu hngalh asi rih lo. Tuni 11am (Eastern Time) ah President Donald Trump nih White House in thawngthanhnak a tuah lai. Hngak rih ko hna usih.
Charhchan: Fox News, CNN, The New York Times, Washington Post, The Guardian, Al Jazeera
