iPhone 13 a chuak cang, nai cawk ve lai maw?

iPhone 13 chuahnak kong cu Apple company nih nizaan ah official tein thawngthanhnak a tuah cang. Atang video ah zoh khawh asi.

US, Australia, Malaysia, tbk ram tampi ah a man zong a thanh dih cang.

iPhone 13 mini, iPhone 13, iPhone 13 Pro le iPhone 13 Pro Max vialte an dihlak in 128GB in an i thok dih. Pro le Pro Max cu 1TB (1000GB) tiang upgrade khawh an si. Adang cu 512GB tiang upgrade khawh an si.

US le Australia ahcun September 17 in online ah cah chung khawh asi cang lai. September 24 ahcun Apple Store dawr vialte ah cawk khawh dih asi cang lai.

US ah iPhone 13 mini cu $699 asi. iPhone 13 cu $799 asi.

US iPhone 13 le mini man

US ah iPhone 13 pro cu $999 asi. iPhone 13 Pro Max cu $1099 asi.

US iPhone 13 Pro le Max man

Malaysia man

Malaysia ahcun October 1 lawngin online (apple website) ah cah khawh asi lai. October 8 ahcun Apple nawl pekmi dawr vialte ah cawk khawh dih asi cang lai.

Malaysia an man cu:

  • iPhone 13 mini = RM3,399
  • iPhone 13 = RM3,899
  • iPhone 13 Pro = RM4,899
  • iPhone 13 Pro Max = RM5,299

iPhone 13 Pro Max 1TB cu RM 7,599 asi. Mah zat tangka hin cun Malaysia ahcun ṭhitum puai tuah khawh asi.

Malaysia iPhone 13 Pro le Max man (graphite color)

iPhone 13 cu iPhone 12 he zei dah aa dannak?

A15 chip an hman caah graphic le sehtha tlawmpal a rang deuh, nain ni fatin game aa kah lomi caah cun aa dannak na hngal lai lo.

Camera thar an hman caah khuaceu tam deuh a lak khawh i background a mawt ter deu khawh caah hmanthlak le video tlawmpal an i dawh deuh lai. Nain, aa dawh lo ciami cu nai dawh hlei lai lo … hehee … na thin hung hlah, nang cu nai dawh ko.

iPhone 13 Pro Max battery cu iPhone 12 Pro Max nakin suimilaam 1 in 2 kar sau deuh a nguh lai.

Australia iPhone 13 le mini man

iPhone 13 Pro le Max screen cu 120Hz an si caah FB, Youtube, Website, tbk. cungtang ṭum/kai le sirlei thai tikah a smooth tuk lai i deh a nuam tuk lai. Nain, Samsung le Android phone man fak deuh pawl ahcun kum 2017 khan a ngah cang. iPhone ahcun atu ceo lawng ngah, mah hmanh cu a man fak chiahrumi Pro le Pro Max lawngah ngah.

A muisam (design) cu aa khat dih ko. Pe 5 hlat cun zapi zaraan nih cun iPhone 12 Pro Max le iPhone 13 Pro Max an thleidang kho lai lo. Cun, hello tinak le FB le Youtube hrawnghrang lawng a hmang i game aa kah tuk lomi nih cun iPhone 12 le 13 aa dannak nan hngal tuk lai lo — game i kah a ṭha kan ti duhnak asi lo, China cozah nih cun ngakchia ṭhanning a hrawh ati caah zarh 1 ah suimilaam 3 lawng game kahter dingin upadi a ser cang. India state cheukhat zongah game tampi cozah nih an khap.

Muici (color) cu iPhone 13 le 13 mini caah phun 5 a um;

  1. Pink
  2. Blue
  3. Midnight (black)
  4. Starlight (white) le
  5. Red an si.

iPhone 13 Pro le Max caah cun color 4;

  1. Sierra Blue (light blue)
  2. Silver
  3. Gold le
  4. Graphite (grey) an si.

Adang cu zei pipa aa dangmi um lo.

Australia iPhone 13 Pro le Max man

Bia donghnak

iPhone 12 aa tlaih liomi caah cun cawk a phu lo, tangka hlohnak na hngalh lo ahcun letian in hei cawk ding zong cu si ko. Nain, iPhone 7 le 8 hrawnghrang aa tlaih liomi caah cun cawk phu asi ko. Tampi a ṭha deuh.

Nai cawk ve lai maw? iPhone 13 hi zeitin dah na ruah? Zei color dah na uar cem? iPhone maw na uar deuh Samsung?

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...