Inn man pek awk ka ngeih tilo ruang ah inn ngeitu nih a ka dawi, umnak ka ngei ti lo: India um Laimi Upa pakhat

Delhi Chin Refugee

Salai Cung Dawt: Thinlung a fak ngai mi nizaan ka boruak

Nizaan ah UNHCR-Delhi office bawmhnak an ka hal caah CRC President ka sawm i UNHCR office ahcun kan kal. UNHCR office hmai ka phak ah kanmah Laimi Upa pakhat office hmai ah a rak um, a hmai te ah catar “Inn man pek awk ka ngeih ti lo ruang ah inn ngeitu nih a ka dawi, umnak ka ngei ti lo” timi catar he a rak tthu ko.

UNHCR zung lei zong fuh hmasa loin a mah sin te ah ka kal, a ke hram ah ka tthu i bia ka ruah. Kumkhua lei in upa a si ve ko cang. kumthum chung inn man ka pe kho ti lo e a ti.

A ngandam tuk fawn lo, zunthlum a ngei mi a si. Ka mithli a tla hnik, Delhi Laimi chung in hi bantuk dirhmun kan rak um rih ka theih bak tung lo ka ti, keimah zong mawh kaa phorh ngai ngai.

Kum 2017 hrawng tiang hi Delhi Laimi kan harsa ngai rih, cu caah CHRO lei in bomhnak halpiak nak zong ka rak tuah tawn i phasia, facang, chiti, khuasik thilri le puan ti bantuk rak bomh mi chungkhar hi an tlawm lo.

Asinain, dirhmun aa thleng ve ngai i dirhmun chia ngai ngai i a um mi cu an um ti lo tluk a si. Khrihfabu cio in i zohkhenh le zuanhnawh zong a si fawn. Cun community kip in zohkhenh le tlangtlak ngai zong a si ko caah harsa le vansang chiahru hi kan um ti lem lo tiah ka ruah.

Asinain, tutan UNHCR office hmai te ah a rak um mi cu lungdongh vansang taktak a rak si. Nan community upa zong ka chonh hmasa hna lai i an mah lungtlinnak a um i nan community nih an mah letterhead le seal cumh mi tein na konglam tial hna an sian ko ahcun a herh ningin kan cawlcang colh lai, tiah ka hnemh.

UNHCR sin ah tampi chim cu a si ko, nain zeidah kan cawlcangh awk a si timi kha ka fian ngai caah timhtuahnak ngei tein a caah khuaruah a si. Umnak a ngeih ti lo caah zunthlum a ngei mi nutung, nuhmei pakhat UNHCR office hmai, fikfa lak ah ka riak lai ti cu thinlung a nuam hrim lo. Nuhmei ngaktah kan kal tak hna ahcun Pathian kan cung ah aa lawm lo sual lai ti zong phan a um.

Ka nunnak nih a celh lo caah ka rak tarlangh bia a si, a herh ahcun a muihmai le sining zong ka langhter te men ko lai.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.