Naite i Indianapolis ah meithal zuun 33 a firtu kha video record ningin cun Chin mino chung in an si ko ti zumh a si tiah Southport palek nih Chinmi sinah an chim.

US caan August 13,2019 zanlei ah Chin Community of Indiana (CCI) nih naihrawng Indy i meithal kahnak a chuak pah lengmangmi kong he pehtlai in Emergency meeting an auh i Khrifabu kip pastor le upa pawl minung 100 deng an chuak. Southport police Chief Vaughn le Deputy Chief Schneider nih an telpi hna.

Southport chief police 2 nih upa pawl an chimhmi hna cu;


– Meithal zuun 33 a firtu kha video record ningin cun Chin mino chung in an si ko ti zumh a si an ti. Firmi meithal hi zuun 6 cu police nih an tlaih khawh cang i meithal firmi a ngeitu minung 3 zong an tlaih chih hna an ti.

– Meithal dawr an bauh hnu in meithal kahnak voi 6 a chuak cang i an kahmi hna hi Chin mino 4 an si an ti. A kaptu zong, kahmi zong misual (gang) bu i ai telmi an si kho men tiah an chim. 


– Chin mino 4 nih an i monghmi mawṭaw ah meithal zuun khat, zuun 33 firmi chung si lo in, meithal dang hmuh le tlaih a si tiah an chim.

– Chin mino a lemsoi (recruit) tu hna gang bu phun 3; Asian Boyz, Southside Crips le Vice Lords hi an um an ti. Nulepa nih fale tlonlen ning le an hawi komhmi hna ngiat le hngalh i zuam cio ding a biapi tuk tiah ralrinnak zong an pek hna ti a si. – The Chin Voice

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.