Indiana State Sianginn Dihlak Ah Meithal Cheknak Caah ‘Metal Detector’ An Pek Hna

Indiana state – US ram ahcun ahopaoh nih fawi tein meithal cawk a ngah cang cun ngakchia cheukhat zong meithal he sianginn an kai i minung tampi an kah lengmang hna.

Naite zongah kum 13 siangngakchia pa cu Noblesville khua ah meithal he sianginn a kai i siangngakchia dang a kah thluahmah hna.

Cucaah, Indiana state vuancichoh/governor Eric Holcomb nih, “India state chung i cozah sianginn vialte ah free in meithal/thir checknak (metal detector) kan in pek hna, a duhmi min pe uh,” tiah thawng a thanh.

Indiana state cozah lutlai

Indiana state chung sianginn 90% leng nih “kan duh ko, kan pe ve” tiin minsen an thut cang.

Siangngakchia 250 ah meithal/thir checknak pakhat pek a si lai. Siangngakchia 500 umnak sianginn ahcun 2 pek an si lai.

“Siangngakchia an himnak hnga vennak caah meithal/thir pek kan timh hna hi si,” tiah Indiana state vuancichoh nih a chim.

“Sianginn ah kan lunghrinhmi um caan paoh ah meithal/thir checknak (metal detector) cu kan hman lai. Ni fatin cun kan hmang lai lo,” tiah Noblesville sianginn hruaitu pawl nih hman an timh ning an chim.

Indiana State Cozah Lutlai Eric Holcomb nih, “kan state chung sianginn vialte a himnak dingah zei dah kan tuah lai, August 1 hlan ah ruahnak rak chuahpi uh,” tiin Indiana Fimcawnnak Zung le Lahwahkah Zung cu a fial hna.

Atutiang ah zei bantuk ruahnak phun dah chuahpi an timh timi balte cu an chim duh rih lo. “State cozah lutlai cabuai a phanh hnu lawngah amah nih zei hi dah kan tuah lai, zeitik in dah kan thok lai ti cu a khiahte lai,” tiah Fimcawnnak Zung biachimtu nih a chim. _Fox 59

Leave a Reply

Your email address will not be published. Required fields are marked *