US ram, Indiana Ngandamnak Zung (IDOH) nih COVID-19 kakuaisi le ngandamnak kong thil biapi deuhmi vialte cu Laica (Hakha) le Kawlca in leh dingin a cohlan cang, tiah Burmese American Community Institute (BACI) sin in thawng kan theih.
Mipi nih COVID-19 kakuaisi chunh an duhnak hnga, Indiana Minorities Health Coalition le IDOH he rianṭuan ṭi dingin meeting an tuah lio ah BACI nih “kan miphun tam deuh cu Mirangca an fian lo caah Laica le Kawlca zong in let/chuah uh” tiin a hal hna i an cohlan hi si.
“COVID-19 le ngandamnak lei mit lawng si loin, hmailei caan saupi tiang kan ca, holh le nunphung kilvennak le ṭhanchoternak ah a ṭhahnem lai tiah ka ruah. Kaa lawm tuk,” tiah Pu Elaisa Vahnie, BACI Executive Director nih a chim.
Pu Vahnie cu Indiana State COVID-19 Health Disparities Task Force zongah committee member in aa tel ve.
COVID-19 kakuaisi le ngandamnak biapi mi thil pawl hi Chinmi, Kawlrawmmi le miphun hme hna nih cozah sin in thawngpang an theih khawh ve nakhnga le an covo an co khawh venak hnga caah Pu Vahnie cu October thla zong ahkhan Indiana Hluttaw (State Assembly) ah bia a rak chim.
BACI cu COVID-19 aa thawk ka tein ralzaam community himnak caah biatak le fak piin kan ṭuan i atu zong US cozah, Indiana state cozah IDOH, IMHC le a dang ṭuanṭi hawi hna he ṭangin COVID-19 kakuaisi phawtzamhnak khua kan khang cuahmah, tiah Pu Vahnie nih a chim.
