India rili veng ralkap nih Andaman rili ah Rohingya ralzaam 81 an khamh hna. A thimi minung 8 an um, 1 a tlau, tiah India Ramdang Vuanci Zung nih tuni ah a thanh.

Rohingya ralzaam pawl an i citmi lawng cu a rawk dih. Nain, a nung mi pawl cu India ram chungah kan luhter hna lai lo tiah Ramdang Vuanci Zung nih a ti fawn.

Ralzaam humhimnak petu UN nih February 11 ah Bangladesh ram, Cox’s Bazar in aa thawhmi Rohingya ralzaam citmi tilawng a tlau tiah kan hnu zarh ahkhan thawng a thanh.

“Rohingya ralzaam pawl cu an i thawh ni 4 hnu ah rili cungah an ti lawng seh a rawk. Cucaah, dinei awk an ngei ti lo i cheukhat cu ti hal in an zaw,” tiah Ramdang Vuanci Zung in biachimtu Anurag Srivastava nih a chim.

Rohingya ralzaam pawl cu India rili veng ralkap tilawng 2 in an khamh hna. Ngakchia 23 an i tel.

Anmah pawl cu an umnak hmun ah kuat tthan dingin India cozah le Bangladesh cozah an i ceih lai.

Bangladesh cozah nih ralzaam camp in a chuakmi tilawng pakhat hmanh kan hmu lo tiah Nikhatni ahkhan a chim. – The Star