India nih Pakistan ah missile ka kah sual, ati

India cozah nih, “Pakistan ram ah missile ka kah sual,” tiah thawng a thanh.

“Missile kahnak seh kan remh lio ah seh a ciangkuang lo i aa kap sualmi si,” ati.

Mah ruangah Pakistan nih a ram um India cozah palai cu bia hal dingin a tlaih.

India le Pakistan hi nuclear hriamnam a ngei veve mi an si pinah Kashmir peng ah ramri cuh in aa kap pah lengmangmi an si caah hi bantuk thil tuah sual hi an i ralrin ngaingai a herh, tiah ralkap lei thiamsang pawl nih an rak chim tawn.

India Ralkap Vuanci Zung nih, “March 9 ah missile seh kan remh lio ah amah tein aa kap sualmi asi.

“Missile cu Pakistan ram ah a tla tiin kan theih. Kan kah sualmi cu kan lungṭha lo tuk nain, mah ruangah minung nunnak a liammi umlo caah kan i lawm,” ati.

“Mah bantuk hi hmailei ah um tinak hnga lo, felfai tein hlathlainak tuah dinngin cozah nih biaceihzung nawl a pek,” ati.

Pakistan nih, “Hi bantukin na daithlan ruangah tuksapur thil a chuak kho ti hngal law hmailei ah um ti lo dingin a herhmi paoh tuah,” tiin India cu a sik.

Pakistan ralkap biachimtu nih, “Van sangpi ah a zuangmi missile cu India ram Sirsa khua in an kah i Pakistan ram nichuahlei um Mian Channu khua pawngah a tla,” tiah a chim.

“Mah missile a zuannak hi India le Pakistan ramchung ramleng vanlawng zuannak lam asi caah ṭihnung taktakmi asi. Minung tampi an thih khawh pinah vawlei a tlaknak zongah innlo tampi a rawk khomi si,” ati.

Pakistan Vanlawng Ralkap bawi pakhat nih, “India nih missile a kahmi cu pe 40,000 sang in a zuang i Pakistan ram chung meng 77 tiang a hung lut,” tiah a chim ve.

New Delhi um Jawaharlal Nehru University professor Happymon Jacob nih, “Mah missile cangsual kongah nuclear ngeimi ram 2 nih puitling tein khua an khan caah ka lawm tuk. Missile nih a hrawhmi Pakistan inn kha India cozah nih tangka a liam herh,” tiah Twitter ah a ṭial.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...