India ram ah Nithumni lawngah Covid-19 zawtnak in a thimi 3,293 an si i Covid-19 in a thimi dihlak 201,187 an si cang.

Nain, thiamsang pawl nih Covid-19 in a thimi taktak hi hinak in an tam kho tiah an ti.

Liamcia suimilam 24 chungah Covid-19 zawtnak ngei hmuhmi 360,000 an si i, zawtnak ngei hmuhmi dihlak 18 million an si cang.

Tu thla chung lawng hmanh ah Covid-19 mizaw thar 6 million an si.

Sizung ah ihkhun le oxygen i za ti lo tiang in Covid-19 mizaw an karhmi hi ramkhel le biaknak puai pawl ruangah a si an ti len.

New Delhi ko ah a zual. New Delhi ahcun mizaw ihkhun pakhat ah mizaw 3 hna an ihter hna. Cun, sizung leng ah mizaw a tomtom in an thi. Sikhan pawl ah oxygen a dih.

India ram ah atu tiang ah Covid-19 raikhamsii 150 million an chunh cang hna. A ral aimi Nirukni thok in tar telhin minung 600 million chunh an timh hna.

Nain, state cheukhat nih cun Covid-19 raikhamsii a za in an ngeih lonak an chim. Thiamsang nih a zualnak hmun le upatar pawl usape chunh dingin cozah a forhfial.

India ram ah nifatin Covid-19 in a thimi an tamtuk caah thlanhmun zong nih a zo ti hna lo i a khangh in an khangh hna.

Cheukhat cu an dum chung hna ah an phum hna.

UN zong nih India kong cu biatak tein a au pi i ram tampi nih oxygen le a herhmi siiai bawmhnak an pek len.