Chin state in India ah Bible sianginn kai aa thawhmi Chinmi 26 cu India hmatpungṭin/ID deu an i tlaih ruangah Assam state ah palik nih an tliah hna.
Liamcia 2 ahkhan Chinmi pa 16 le nu 10 cu Mizoram khualipi Aizawl in Guwahati khuapi an phak tlawmpal ah an tlaih hna.
“Myanmar ram, Chin state in a rammi minnung 26 cu Bible sianginn kai dingin Delhi lei ah kal an i thawh. Mizoram ah sermi India ID deu Aadhaar card, Voter ID tbk an i tlaih,” tiah Assam Palik nih an chim.
Mizoram Palik Bawizik John Neihlaia nih, “Mizoram ah sermi India ID deu an i tlaih an timi kong he pehtlai in thil sining tling deuh in kan hlat lio asi.
“Card deu an i tlaihmi cu Mizoram ah sermi asi tiin Assam Palik nih an chim. Cucaah ka ṭuanhawi pawl cu Assam Palik cu thil sining tling deuh kan chim ve uh tiin ca ka kuat ter hna. Mizoram ah sermi asi tak ahcun a sertu minung kan hlat tlaih khawh hna lai.
“Kanmah nih kan theih ning ahcun, mah bantuk ID deu pawl cu Manipur, Bengaluru le Delhi ah an tuah tawn. Mizoram ah ka hmu bal lo,” ati.
Kawl ralkap nih mipi thimmi cozah uknak a chuh thokin Chinmi thong 11,000 leng Mizoram ah an zaam cang.
Chin ngakchia pawl (400 hrawng) cu Mizoram cozah nih an phaknak khua cio ah sianginn a kaiter hna.
Chinmi le Mizo cu an pipu chan in thisa khat unau an si.
Mah kong he pehtlai in Mizoram Ramchung Vuanci Lalchamliana nih, “Mirang an rak rat hlan ahcun Chin state le Mizoram state hi ram pakhat a rak si. Mirang nih an kan uk hnu ah kan ram hi Burma le India ah an kan ṭhencheu. Nain nihin tiang, Chin le Mizo cu kan i ṭhium peng i thisa kan i pehtlai peng,” ati.
Charhchan: INDTV, The Hindustan Times, The Indian Express le East Mojo
