Hotel man a pek khawh lo caah manager pa a thah

Kalaymyo i Tat Oo Thida sang um Sein Hotel ah thla 1 leng a ummi pa Thein Hteik Win, kum 42 nih hotel manager U San Htay cu nam in a sawh thah hnu ah saikal in ṭhi aa zaampi.

January 10 zaan 8pm hrawngah Kalaymyo um Kawlkulh khuate le Thinbawpin khuate karlak lamkam ah nam sawhnak hma pawl he a rak thimi pa cu pawngkam khuami nih an hmuh.

Khuami nih palek sakhan ah thawng an thanh tikah miruak cu Sein Hotel manager U San Htay, kum 50 hrawng asi ti an hngalh.

Kawlkulh khuabawi Pu Ramnieng nih, “ka va phak cun zaan 8pm asi cang. Ruak cu lamkam ah a rak um, namte pakhat zong kan hmuh. Ruak cu nam sawhnak hma 5 hrawng a um. Zaan 10pm hrawngah ruak cu an rung lak,” tiah a chim.

Thein Hteik Win cu Sein Hotel ah a umnak thla 1 hrawng asi cang. Hotel man pek awk tangka lak ding ka ngei tiin manager pa cu bawmh a hal. Manager pa nih a va thlah lio ah atu bantukin a thah hi si.

Kalay palek bawi Bo Bo Aung nih, “manager a thattu Thein Hteik Win hi a chuahkehnak Kalay asi ve ko. Nain, a nulepa cu Kalaymyo ah an um ti lo. Mah ruangah umnak inn a ngei ti lo,” tiah a chim.

“2013 ah Kalaymyo Forest bawi a thah caah thong a rak tla bal. Thong in a chuahnak zong a sau rih lo. Atu hi tlaih dingin kan kawl liopi asi,” ati.

Charhchan: Zalen