Honduras Rammi 8,000 Hrawng US Lut Dingin an Ra, Guatemala Ralkap nih an Kham Hna

- Advertisement -

Honduras rammi thong 8 (8,000) hrawng cu US lut dingin an ra cuahmah nain Guatemala ram an phak ah Guatemala ralkap le palek nih US lei lan kho loin an kham hna.

Mipeem thong 8 hrawng cu US lei lan dingin Guatemala ram highway an tan lio ah Guatemala ralkap le palek nih teargas in an kah hna i phaw in an nam hna caah an lan kho lo.

Mipeem pawl cu Honduras le El Salvador ramri in meng 34 hrawng a hlatnak Vado Hondo khuate tiang an va dawi hna.

Guatemala ralkap le palek nih highway lam cungah phaw he Honduras mipeem pawl an nam/dawi hna lio

“Kan thinphang,” tiah Honduras rammi hringtu nu Pi Rosa Alvarez nih a chim. “Zalong tein US lei ah lanh kan duh,” ati.

Mipeem thong 8 hrawng cu US lei lan kho loin Guatemala cozah nih a kham peng hna caah ‘thih le thih, nun le nun’ tiin Zarhpini ahkhan Guatemala ralkap le palek cu an pah hna i an buai taktak.

Sinain an lanh khawh hlei lo caah, minung thong 2 hrawng cu highway in US lei lanh an i timh lio ah atu bantukin Guatemala ralkap le palek nih teargas in an kah hna i phaw in an nam hna hi si.

US luh aa timmi Honduras mipeem thong 8 hrawng Guatemala ram an phak lio

Mah hnu cun, mipeem pawl cu Vado Hondu khuate ah an kir hna. Lam dang in US lei lanhnak khua an khang, tiah Guatemala cozah nih a thanh. An ram Honduras ah minung zeizat dah an kir cang ti cu hngalh asi rih lo.

Mipeem lakah ngakchia he a rami chungkhar tampi an i tel. Mipeem tampi nih, “November thla ah thlichia nih voi 2 tiang kan ram a den i kan innlo a rawk dih, cun COVID-19 pulrai ruangah rian a um lo i rawl ei awk kan ngei ti lo, kan sifah tuk caah US lei ah rawl kawl in kan zaammi asi,” an ti.

Guatemala cozah nih, “Ningani in atutiang ah mipeem 1,500 hrawng cu an ram ah kan khirh khawh cang hna. El Salvador ram ah minung 100 hrawng an kir, adang paoh cu Honduras ah an kir,” tiin Zarhpini zaan ah thawng a rak thanh.

Zarhpini ah Honduras mipeem pawl le Guatemala cozah an i phomh lio

Donald Trump bantukin ramri ah mipeem pawl saram tuah in ka tuah hna lai lo, minung hawi cio bantuk tein ningcang tein ka tawlrel hna lai, a titu Pu Joe Biden (Democrat) nih thaizing in US president a ṭuan cang lai.

Biden president a ṭuan cang lai caah US kan lut kho deuh lai ti an i ruahchan zong asi kho men, nain Trump president asi lio kum 2017 le 2018 zongah Honduras, Guatemala le El Salvador rammi thong 15,000 hrawng US lut dingin an rak ra. Trump acozah nih US ramri ah a kham dih hna i ngakchia le hringtu nulepa zong a dangdang in thong a thlak dih hna caah Democrat nih “minung tuah in na tuah hna lo” tiin an rak soisel peng. Mipeem tampi cu US lei hrim luhter loin Mexico ram ah an erh hna. Mi tampi cu lung dongh in an ram ah an kir.

Honduras rammi pawl cu tanglam in US luh an duh ahcun Guatemala ram an tan hau. Mah khawh cun Mexico ram an luh hau. Mexico in Us luh asi. Mexico le US cu aa rimi si.

Lailei sifah ruangah tanglam in Malaysia a rami nih cun an bawah hi tuarpi khawh ngai an si, zaangfak tuk an si.

Honduras rammi pawl cu Mexico president nih, “hramhram le phungninglo in Mexico ram kan lut kho lai ti cu i ruahchan hlah uh,” tiin media sin in ralrin a pek ve hna.

Guatemala cozah nih, “Honduras cozah nih a rammi kham a kan bawmh lomi hi cu khuaruahhar bak asi,” ati.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...