By Lal Nuna | Khonumthung — Nai hrawng Chin state ah an buaipi ngaimi “Ralbawi Aung San milem cu kan phun rih lai lo, Sipin Panchian sak hnu ah Panglong sachoh i minsen thuttu Chin hruaitu 3 milem he kan phunṭi te lai,” tiah Chin state cozah biachimtu Sipin Vuanci U Soe Htet nih a chim.
Sipin Panchian cu Hakha khuapi chuahnak zawn vawlei acre 3.8 ah sak dingin Chin state cozah nih a timh liopi asi i kum 1 paoh a rau rih lai. Sipin Panchian an sak dih hnu lawngah, mahka hmun chung cun kan phun te lai, tiah U Soe Htet nih a chim.
“Ni kum tein, Panglong sachoh ah min a thuttu Chin kan ruaitu 3 philh lonak lungphun kan tuah lai i Chinca, Kawlca le Mirangca in an tuanbia kan ṭial lai kan ti cangmi si, nain ni kum budget kan i zat lo ruangah kan tuah lo.
“Atu cu Sipin Panchian sak hnu ah Ralbawi Aung San milem lawng si loin Chin hruaitu 3 milem he, lungphun he kan tuahṭi lai tiah timhtuah asi cang,” ati.
Mipi hmurka
Chin khualipi Hakha ah Ralbawi Aung San milem phun an timh, timi thawngpang a len cangka in Chin mipi nih an duhlonak fakpi in an chim cio. Chin mipi nih cun ‘Aung San milem phun nakin Panglong sachoh ah bia a kan kamhmi tu kha tlinter i zuam deuh hna seh’ ti an duh.
Mah kong he pehtlai in Chin Miphun Democracy Bu (CNLD) party joint Chairman Pu No Than Kap nih, “Aung San nih bia a kan kamhmi tu kha tlangcung miphun vialte nih kan duhmi asi,” tiah a chim.
“Aung San nih bia a kan kamhmi an tlinter hnu ah inntek miphun hna nih a milem zong phun chih usih an ti ahcun phun dang si.
“Aung San nih bia a kan kamhmi; tlukruannak, mahte khuakhan lairelnak, tbk., hna atutiang kan ngah rih lo. Mah lio ah a milem phun hnawh a kan timh tikah mipi nih phun dangpi in an hmuh.
“Cun, cozah nih amah nawl in milem a phun awk si lo. Tuchan cu democracy asi cang bangin inntek mipi tam deuh duhnak kha ruahchih in rianṭuan a herh. Rampumpi Hlutdaw ah MP tam deuh a ngahmi party nih miphun hme namneh phun le kanmah duhmi paoh kan tuah khawh ti phun in rianṭuan cu a phung si lo,” tiah a chim.
