Hakha SAC ralkap a zaammi Hin Lian Piang nih SAC dirhmun a phuan

- Advertisement -

Hakha SAC ralkap sakhan ah a ṭuanmi ralkap senthum Hin Lian Piang nih CDF sin a zaam hnu ah Laitlang ah ralkap thil tuahmi le atu lio an dirhmun a phuan — Anih hi Hakha um SAC ralkap bawibik BrigGen. Myo Htut Hlaing zungah case tlaitu asi bang a chung thil tampi a hngalh.

SAC ralkap nih Hakha khuami 2 an tlaih hna i thi lakin an velh hna

“SAC ralkap nih mipi cungah an tuahmi vialte lakah ka celh lo bikmi cu, Hakha ah mipi 2 [Pu Tler Ling le Pu Khamh Bawi] an tlaih hna i thi lakin an velh hna.

“A thi cangmi an ruak cu glucose an rawnh i motor in Kalay ah an kuat. Kalay ah sibawi pawl ruak an hlai ter hna hnu ah ruak cu an khangh.

“Sibawi pawl nih an duh lo nain an tlerh hna i lih hrokhrawl in zawtnak ruangah an thi tiin an thihnak aruang an tuahter hna.

“Hi bantuk an thil tuahmi ka hmuh tikah anmah sin rianṭuannak thazaang ka ngei kho ti lo,” tiah Hin Lian Piang nih a chim.

Khrihfa hruaitu pawl hi mipi rialditnak caah an hman hna

“SAC nih biaknak hruaitu (Khrihfa hruaitu) pawl an ton hna i mipi rialditnak caah an hman hna. Biaknak hi ramkhel caah an hman. Hihi an kan nehsawh asi ti hi vawleipi nih thei hna seh ti ka duh

“Cun, SAC nih dothlennak a tuahtu le mipi hi zawnruahnak ngei loin hriamnam ngan in duhpaoh in an kah hna. Keimah hrim nih ka hmuhmi asi. SAC ralkap pawl hi ramdang tapung/ralhrang lungput an ngei, ti hi vawleipi nih thei seh ti ka duh,” ati.

Cozah rianṭuan pawl meithal an tlaihter hna

“CDM tuah loin zung a kaimi cozah rianṭuan pawl hi meithal tonghtham ning an chimh hna i meithal an pek hna. Cutin mipi hi ralkap caah an hman hna,” ati.

Uknak an fir hnu in SAC ralkap niam pawl an temtuk

“Uknak an fir hnu hrim cun SAC ralkap bawi pawl nih an kuttang ralkap an kan neek tuk. ‘Fialmi tuah, pekmi ei, bia kan let hlah’ ti phungthluk an i ngeih caah ralkap tampi nih kan tuar kho lo i kan zaamnak zong hi asi,” ati.

Hakha SAC ralkap 3 an i that cang

“Atu lio cu chun he zaan he suimilaam 24 chung rianṭuan asi caah ralkap pawl an thaba tuk. Khatlei in an chungkhar an sifak fawn. Thabat le lungretheih celh lo lungdongh in Hakha um SAC ralkap 3 tiang anmah tein an i that cang,” ati.

Hin Lian Piang

SAC ralkap nih Chinmi inn an kan khanghpiakmi le an kan thahmi kong ah, “Hihi cunglei bawi nih an fialmi hna zong asi kho ko, cun tanglei ralkap pawl zong nih ‘a sining paoh in va si seh’ tiin an tuahmi zong asi kho,” tiah a chim.

“Atu cu kahdohnak a umnak Mindat khua hoi hna cu ralkap nih an hrawh dih cang ti khawh asi. Thantlang zong mah ṭhiam. Kahdohnak a um lonak khuate pawl hmanh nih an ṭih bikmi cu an khua ah ralkap phak hi asi, ralkap hi tapung nakin an chiakha deuh.

“Ralkap pawl hi tinṭan an pek hna lio hrimhrim in hrem le thlanglamh uknak an cawnpiak hna. A sang deuhmi nih a niam deuhmi neek an cawnpiak hna caah mipi sin an phak tikah mah lungput khan mipi an neek ve hna.

SAC ralkap pawl zaam kho lo dingin an kan tuah

“Hakha, Falam, Tedim tbk SAC ralkap chungtel Chinmi pawl cu ‘kan zaam lai lo…’ timi biakamnak catlap ah minsen an kan thut ter.

“Kan chungkhar tlaih/hrem/thah piak dingin an kan tlerh. Atu zong hi ka chungkhar an tlaih cang hna. Chungkhar cu kan caah a biapi bik an si bantukin ralkap tampi nih cun mah bantuk an hmuh/theih tikah zaam an ngamh ti lo.

“Cun, ralkap tam deuh cu lenglei mi he an i pehtlaih khawh lo caah zeitin dah kan zaam lai i ho dah kan pehtlaih lai timi an hngal lo,” ati.

Atang video ah a chimmi tling tein zohngaih khawh asi

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...