Hakha khuapi ah sipin nih parking man a lakmi mipi an lungtling lo

Hakha khuapi ah sipin nih parking man a lakmi mipi an lungtling lo

Chin state, Hakha khuapi ah October 1 thok in Sipin nih motor, motorcycle chiah man le zaan riah man a lakmi kongah mipi an lungtling lo.

“Kan chim ko ahcun atu hi Hakha ah sipin nih motor parking a dang tein a tuah rih lo cumu. Motor ngan pawl chiah man a lak ahcun phundang deuh a si. Nain, inn citmi motor pawl cu an inn pawng um lam kam ah an chiah lo ahcun khoika ahdah an chiah lai i. Ket-ta-za lam cung ah an chiah lo paoh ahkhan cun aman an lak hna awk si lo ka ti. Ket-ta-za lam cung chiah lomi tiang tangka liamter kha cu a si deuh lo ka ti” tiah Hakha mino Salai Biak Cin Thang nih a chim.

Hakha khuapi ah motor, cycle tluang tein kal kho hna sehlaw accident zor deuh seh tiin Sipin nih October 1, 2019 thok in khan motor le cycle chiah man a lak.

Chin state Sipin nih catluan a chuahmi ah Hakha khuapi Pyidawtha sang, Gangawlam View Point in State lamuk zung tiang, State lamuk zung in lansone tiang, lansone in cozah zung tiang, cozah zung in Thangtlang lampial tiang, Thantlang lampial in Hakha Thar (6) tiang lam kam dir motor ngan le motor laivuang cu zaan khat chiah man ah Kyats 1,500 liam ding a ti.

Motor hme si ahcun zaan khat chiah man ah Kyats 1,000 si seh a ti. Chun ahcun rikhiahnak hmun pawl ah motor (motor ngan, laivuang le hme) chiah man cu Kyats 200 le motorcycle si ahcun Kyats 50 liam si seh a ti.

Hakha khuapi ah nifatin motor, cycle a karh i lam kauh chap awk a tthat ti lo caah mipi lei nih ningcang tein motor le cycle chia hna seh tiin chiah man kan lak hna hi a si tiah sipin rianttuan U Tam Aung Shing nih a chim.

“Hakha khuapi lam hi a kau ngaimi a lo nain a bi ngai. A ruang cu nifatin, thla fatin in a tthangcho. Motor le cycle an karh ning tuak tik ah kan lam hi duh sah tein a bi chin lengmang. Zei ti hmanh in lam kauh chap khawh si ti lo.”

“Lam kan kauh chap lai kan ti ahcun inn ttheng lawng tang cang. A hlan lio pi in lam kauh ding zat cu kan kauh dih cang. Kauh chap awk um ti lo. Cu ruangah, motor le cycle cu ningcang tein chiah thiam a herh.” tiah a chimchap. – Khonumthung

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.