Hakha khuami: Cozah nih inn a hrawh tikah inn chungah kan um lai

Hakha khuami: inn an hrawh tikah inn chungah kan um lai

Hakha khuapi ah cozah nih mah nawl in sakmi inn pawl cu thaizing in hrawh hram a thok hnik i, inn ngeitu nih an duh lo caah ‘nunnak pek in kan inn cu kan ven lai’ tiah Hakha khuasa Pu Ram Peng nih a chim.

“Hakha ah lehtama hlan ahcun ni khat caah Kyats 20,000 pek a si. Inn hmete sak zongah a tlawmbik Kyats ting 15-20 hrawng a dih. Inn ngan deuh hoi hna cu ting za dih in sak an si. Vawlei cawknak man zong a um rih. Cu ruangah, an hrawh ding cu a si kho lo. Seh in inn hrawh an rat tik ah inn chung ah kan um lai i an duh si le kan hrawk chih te hna seh. Kan thih sile cozah nawl si ko. Cozah cu kan uk kho lo cuta,” tiah Pu Ram Peng nih a chim.

“Atu cozah nih hrawh a timhmi inn pawl hi hmunthar samh dingin lam an ser hlan piin dum caah cawkmi pawl an si. Cheukhat cu dum kau pipi an si. Hmunthar samhnak ca i lam an kauh lio ah dum vawlei tamtuk an hrawh cang. Cozah nih hmunthar kan samh lai a ti in cu hmun ahcun inn hme tete an sak hna hi a si,” tiah Pu Ram Peng nih a chimchap.

Tuni ah tuahmi Chin state cozah le media thla fatin tonnak meetingah cozah biachimtu Sipin Vuanci U Soe Htet nih hitin a chim.

“Cozah zung kip rianṭuan pawl cu thaizing 7am ah minung kan i khawm lai i 8am in hrawh kan thok lai. Zaanlei 6pm tiang kan hrawh lai.

“Inn 8 cu a ngeitu nih ‘kanmah tein kan ṭheh lai’ an ti caah cozah nih a herh ningin ṭheh kan bawmhte hna lai. Adang inn paoh cu kan hrawh viar lai,” tiah a chim. _ Chin World, Photo – Zalen

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.