Nizaan ah CNF le CDF nih Hakha in Thantlang lei kalnak Timit Hlei an hrawh.
October 20 ah Falam lei in ralhrang Kawl Ralkap tampi tank 2 le motor 50 hrawngin Hakha an phak caah Thantlang lei lan kho hna hlah seh tiin Timit Hlei an hrawh hi asi.
Kawl Ralkap pawl cu Hakha lei an rat pah in Falam – Hakha lam ah ummi khuate pawl; Rialti, Lungpi, Thlanrawn, Taal, Tlangzar, Ramthlo, Chuncung, tbk ah inn tampi an khangh. Inn a zaza an baoh hrawh i tangka, facang, chiti, cite, umkheng, saṭhil, tbk vialte an fir piak dih hna.
Thantlang lei an lanh khawh ahcun Thantlang peng khuate tampi an khangh rih lai caah phakter lo dingin CNF le CDF nih a phunphun in an kahdoh hna i lam an hrawhpiak hna hi asi.
Kawl Ralkap pawl cu Hakhathar ah umhmun an khuar. Nizaan tihni le nizaan zingka ah Hakhathar sangmi 18 an tlaih ha.
An tlaihmi 18 chungah COVID-19 mizaw 6 an i tel. BEHS No. Sianginn mizaw zohkhenhnak ah an chiah hna. Mizaw 6 cu;
- Thawng Tling
- Rual Hlei Thang
- Tluang Za Nawl
- Lal Uk Lian
- Rual Lian
- Isaac hna an si.
Adang pawl cu Rungtlang le Palik Sakhan ah an chiah hna. Rungtlang Ralkap LID 266 Sakhan ah minung 6 an chiah hna. A taangmi nu 6 cu Palik Sakhan ah an chiah hna. Nu 1 cu naupawi liomi asi pinah COVID-19 in a zaw liomi asi.
