Chin state, Hakha khuapi ah Influenza A (H1N1) pdm09 zawtnak a ngeimi minung 2 an um tiah Ngandamnak Vuanci Zung nih thawng a thanh.
Ngandamnak Vuanci Zung nih cathluan a chuah ning ah Chin state ah H1N1 zawtnak a ngeimi 2 an um i Kawlram pumpi ah H1N1 zawtnak in a thimi hi 106 an um cang.
“Chin state ah H1N1 zawtnak a ngeimi an um ko. Nain, mizaw 2 cu atu tiang sizung ah an kal rih lo. An tak lin, an cumpi i mah ruang cun kan check hna tikah zawtnak hrik cu kan hmuh. Hakha ah a ummi pa pakhat le nu pakhat an si.”
“An zawtnak ni 10 hrawng si cang nain atu tiang ahcun an nunnak caah thinphan awk a um lo,” tiah State Ngandamnak Vuanci zung rianttuan Dr Aung Ngwe San ( ေဒါက္တာေအာင္ေငြစံ) nih a chim.
2019 August 30 tiang ah Kawlram pumpi minung 1511 sinah H1N1 zawtnak hrik um/lo an check i minung 644 sin ah zawtnak hrik an hmuh. Minung 106 an thi.
H1N1 zawtnak hrik cu zawtnak a ngeimi nih a hahthio, a khuh tik ah pawngkam ah aa tthek kho. Kuat thiang te in ttawl lo ahcun kut in hnar, ka tongh sual tikah zawtnak hrik cu fawi tein ngeih khawh a si. Cu ruangah, kuat thiang tein i ttawl a biapi tuk.
Pum a thianhhlimhmi le immune a tthawngmi sin ah cun cu zawtnak hrik cu fawi tein a phan kho lo. – Khonumthung
