Thailand ram ah tleirawl pa pakhat cu a sianginn khar chungah zaan khuadei game aa celh peng i a computer pawngah a ruak in an hmuh.
Piyawat Harikun (kum 17) cu October thla dongh in khan sianginn an khar i aa manh caan paoh ah a innkhan chung ah computer in game aa celh.
“Zaan khuadei it loin game aa celh. Chun ah a thlalangawng zarh a bil i game cu aa celh rih. A caan tampi cu computer tonghnak ah a hman” tiah a thimi tleirawl pa nulepa nih an chim.
Harikun cu rawlei caan hmanh ah leng a chuak lo i a nulepa nih a innkhan ah rawl an va put. A nulepa nih game celh an thloh zongah a duh lo.
Nikhatni ahkhan Piyawat a pa Jaranwit cu a innkhan ah a va kal i a fapa cu computer pawngah a rak tluk kho kha a hmuh. A pa hi ralkap a si i a fapa cu khamh a timh nain a rak thi cang.
“A min in ka auh i, ‘tho tuah, tho tuah’ ka ti nain zeihmanh a ka let lo. Mah in khan a thih kha ka theih,” tiah Jarawit nih a chim.
Sibawi te nih Piyawat ruak cu an zoh i zaan tamtuk it loin computer in game aa celh ruangah a thluak thahri a cat i a thi tiah an fehter.
“Ka fapa cu a fimtukmi le ca a thiam tukmi a si ko, nain a poinak cu game nih a suai tuk. Ralrin ka pek i kaa thinh deuh cang lai a ka ti. Nain, a tlai deuhvak. Aa tthinh manh hlan ah a nunnak liam. Midang nulepa nih cun nan fale kha game suaiter hna hlah uh” tiah Jaranwit nih a ti. – Daily Mail
