France nih World Cup 2018 A Lak

France nih World Cup 2018 A Lak

World Cup final ah France nih 4-2 in Croatia a tei caah pakhatnak laksawng $20 million man World Cup 2018 trophy pi cu a thlir ruangmang. Mah pinah, laksawng tangka £29 million ($38 million) a ngah chih.

Tutan hi France nih avoi 2nk World Cup a lak si. Kum 1998 ahkhan France ram ah World Cup an rak tuah i France le Brazil final an rak kai. 3-0 in France nih a rak lak.

Croatia nih pahnihnak laksawng £21million ($28 million) a ngah ve.

Russia khualipi Moscow ah tuahmi World Cup final ahhin, chuih in cun Croatia nih an tei ngai ko nain goal an i harh ngai. Goal in France nih an tei cikcek.

An chuihka minutes 18nk ah Croatia pa Mandzukic nih alu in anmah lei ah a goal sual caah France nih 1-0 in an hruai colh hna.

France nih World Cup a co
Pakhatnak laksawng trophy an lak lio

Minutes 28nk ah Croatia lei in Perisic nih a goal i 1-1 in i tluk hna kaw zoh an nuam taktak.

Vanchiat ah, minutes 38nk ah Croatia pa nih a tongh sual ai. Referee nih a hmu lo i foul a pe lo nain France lei an zai tuk caah celtual kam i video (VAR) a zoh hnu ah penalty a pek hna ai.

France lei in Griezmann nih penalty a sut i a goal caah 2-1 in France nih goal thlen tiang an hruai hna.

Croatia nih chuih in an tei ngai caah goal thlen hnu ah Croatia nih a tei tthan ko lai tiah minung tampi nih an zumh peng rih.

Nain, goal thlen hnu ah ruah lo piin France an hung ttha tuk ai.  Minutes 59nk ah France lei in Pogba nih a goal caah 3-1 in an hruai hna.

France nih Croatia a tei
France ram ah mipi a tingting nih sunglawi taktak in an lawmh

Minutes 65nk ah France hmaikal Mbappe nih a goal hoi i 4-1 bakin an hruai cang. Croatia caah ruahchannak a dih thluahmah.

Minutes 69nk ah Croatia lei in Mandzukic nih a goal nain, 4-2 in puai dongh tiang France nih a tei beh.

France hmaikal pawl hi an ran tuk caah ruah lo piin goal an hmang ngai.

France khualipi Paris ah mipi nih sunglawi taktak in an lawmh lio video.

World Cup pathumnak laksawng cu nizaan ah Belgium le England an i cuh, 2-0 in Belgium nih a tei caah pathumnak laksawng tangka £18million a ngah.

England cu 4nk laksawng tangka £16.5million a ngah ve.

Russia ram ah tuahmi tutan World Cup ah Russia telh in ram 32 an i tel. Ram 32 hna cu World Cup ‘timhtuahnak caah’ tiin $1.5 million cio an pek hna pinah a thiam lo bikmi zong laksawng an ngah.

World Cup laksawng tangka an pek hna ning cu;

17nk in 32nk tiang laksawng: $8 million cio

9nk in 16nk tiang: $12 million cio

5nk in 8nk tiang: $16 million cio

4nk: $22 million

3nk: $24 million

2nk: $28 million

1nk: $38 million + $20 million worth of trophy

France President Emmanuel Macron nih teinak an hmuhmi a lawmh lio
France President Emmanuel Macron nih teinak an hmuhmi a lawmh lio

World Cup cu kum 1930 ahkhan Uruguay ram ah an rak thok i Uruguay le Argentina final an kai, 4-2 in Uruguay nih a rak lak. Kum 4 dan pengin tuah a si nain, Avoi 2nk Vawlei Ralpi a rak thawh ruangah kum 1942 le 1946 cu an rak tuah kho lo.

World Cup hi voi 21 lawng an tuah rih i atanglei langhtermi ram 8 nih hin an lak. Tutan hi avoi 21nk a si.

World Cup latu ram 8 hna cu;

  1. Brazil = voi 5
  2. Germany = voi 4
  3. Italy = voi 4 (tutan World Cup ah an i tel kho lo, qualifying match ah an tla)
  4. France = voi 2
  5. Uruguay = voi 2
  6. Argentina = voi 2
  7. Spain = voi 1 le
  8. England = voi 1 hna an si.

Be the first to comment

Leave a Reply

Your email address will not be published.


*