22.2 C
Hakha
Monday, November 18, 2019
More

    Firtong Myanmar nu kum 7 hnu ah China in a rung kir

    Follow Us

    99,184FansLike
    135SubscribersSubscribe

    Ṭial Tharmi

    Facebook nih fake account 5.4 billions hrawng a thah

    Facebook nih, "tu kum chungah fake account 5.4 billions hrawng kan thah i, ngakchia hremnak le mahlemah thahnawnnak an tarmi million tampi...
    - Advertisement -

    Fir a tongmi Myanmar nu cu China ram ah kum 7 chung an hren i fa 4 an hrinter hnu ah Myanmar ram i a chungkhar sinah a kir, tiah NGO riantuan nih RFA sinah a chim.

    Kum 47 nu cu a hrengtu pawl nih a ke 1 an khiah. Lamkam ah China palek nih an hmuh i ramri um Muse khua palek sinah November 1 ah an ap.

    Zarhpini ahkhan Bago khua um a chungkhar sinah an kuat. A chungkhat nih a min tial an duh lo.

    “Firtongmi nu cu a ke pakhat a kiak i a thluak zong hman pah lo,” tiah Muse Hartong Bawmtu Bu riantuan Thaung Htun nih a chim.

    “Fir a tong, hramhram in fa an pawih i fa 4 an hrinter. Atu cu kum 47 asi cang. A tar cang caah an duh ti lo i an hlonhmi si dawh si,” ati.

    “Lamkam ah China tangka tlap a hlonh lio ah China palek nih an hmuh. Palek nih an tlaih i Lahwahkah sinah an ap. Lahwahkah nih Muse khua palek sinah a ap chin.

    “Muse khua palek nih phone an ka chawnh i a thluak hman lomi nu rak la law sizung ah kalpi an ka ti.

    “Minu a inn ka hngalh lo ruangah Yangon um Ywathargyi Thluak Hmanlo Sizung ah kuat ka timh. Nain, a hmanthlak Facebook ah kan tar hnu ah Bago khua um a chungkhar nih a kan chawnh i a chungkhar sinah kan kuat,” tiah a chim.

    “Ka nau cu ka ni he Yangon um kan chungkhat tlawng dingin an kal lio ah lam an tlau i fir an tong,” tiah a unu Aye Aye Than nih a chim.

    “Market chungah mohinga an ei lio ah fir an tong.

    “A tlaunak kum 7 asi cang. China ram um Ma Wai timi nu nih a kan lak tiin a kan chimh.

    “Ka ni cu atutiang zeihmanh a kong kan thei rih lo. Fir a ton hlan ahcun ka nau hi a thluak hmanmi asi ko. Nain atu cu tlawmpal a hman ti lo. Hmasa ahcun punghman minung asi ko.

    “A ke kiakmi cu duhsah tein damlei a panh. Aa ka hrengtu pawl nih ka ke an ka merh i an khiahmi si ati. Zaam kho hlah seh ti an duh caah si men lai.

    “Aa ka hrengtu pawl nih China tangka 30 lole 40 ca tlawmpal an ka pek i an ka thlah ati.

    “Tangka an ka pekmi cu cozah nih an ka chuh cang ati,” tiah Aye Aye Than nih a chim. China maw Myanmar cozah nih dah an chuh ti balte a chim lo.

    Minung firphortu nih duhpaoh in an tuah hna

    Liamcia kum 10 hrawngin atutiang kum fatin Kawlram nu a zaza bak phungninglo in China ram ah an luhpi hna i China pa nupi caah an zuar hna, tiah Myanmar nuhrin covo bu Garuna nih a chim.

    Muse peng Phungninglo Minung Phorh-Dotu Palek Phu lutlai Kyaw Nyunt nih, “China ram ah rian ttha tuk na tuan lai, lahkhah mah zat cu na ei lai… tiah a nuam tuk dingin an hlen hna. China ram an luhpi hna cangka in an duh paoh in an tuah hna,” tiah a chim.

    “Cutin hlen, fir le zuar a tongmi tambik cu Kawlram chung i sifak an tamnak Ayeyarwady region hrawng i nu pawl hi an si,” ati.

    Aho paoh zumh ding an si lo. Tangka ti paoh ah lungzuan ding asi lo. I ralrin hau.

    Chinmi zong Yangon le Mandalay hrawng nan kal tikah aho paoh zum hna hlah uh. Ralring tein um uh.

    Nawlnak: Kan website chung ca hi website dangah copy piak lo dingin kan in nawl hna.
    Lian
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.