Pfizer COVID-19 raikhamsi cu US cozah Sii le Rawl Zung (FDA) nih tling tein a cohlan cang.
Hmasa ahcun FDA nih Pfizer, Moderna le Johnson & Johnson cu ‘lakhruak poipang (emergency)’ lawngah hman dingin a cohlan hna.
Nain, nizaan ah Pfizer cu zei tik paoh ah COVID-19 raikhamsi caah hman dingin tling tein a cohlan cang.
Moderna company zong nih FDA sinah “tling tein cohlan piak dingin” a sok ve nain mah ca kan ṭial lio tiang ahcun FDA nih bia a khiak rih lo. Johnson & Johnson tu cu a sok rih lo.
Pfizer company CEO Albert Bourla nih, “FDA nih COVID-19 raikhamsi tling ah a kan cohlan piak cang caah raikhamsi chunh a lungawṭawmmi hna caah i sungphiat a fawi deuh cang lai, cun raikhamsi chunh a duhmi an karh deuh lai,” tiah a chim.
“FDA nih tling tein a cohlan rih lo caah tiin raikhamsi chunh a duh rih lomi pawl, atu cu vawlei cungah upat bikmi FDA nih tling tein a cohlan ko cang hih … raikhamsi hi a ṭha in a him ko tiin a cohlan cang ko hih,” ati.
Voi 3nk chunh cio kan hau lai
Pfizer CEO Bourla nih, “Chawnh a fawi tukmi le thih a fawi tukmi Delta Variant a karh tuk caah le thla 6 hnu ahcun raikhamsi tha a zor caah ṭhawnternak caah voi 3nk i chunh cio kan hau hrimhrim lai,” ati.
Kan hnu zarh zongah US President Biden acozah nih, “Pfizer raikhamsi voi 2nak aa chunhnak thla 8 a tling cangmi paoh cu September 20 thokin voi 3nk chunh nan ngah dih cang lai,” tiin thawng a rak thanh.
US ram ahcun raikhamsi phun 3:
- Pfizer
- Moderna le
- Johnson & Johnson lawng an hman hna.
Pfizer hi FDA nih emergency caah hman dingin a rak cohlan hmasa bikmi asi caah Pfizer aa chunmi an tam cem. Nizaan tiangah Pfizer raikhamsi 204 million leng an chunh cang hna, tiah CDC cazin ah hmuh khawh asi.
