Tuni January 16 ah Chin state, Falam peng, Parte khuate le Lumbang khua kar ah ralhrang Myanmar ralkap he kan i kap i tampi an thi kho men, tiah CNDF nih Zalen sinah a chim.

Mah ruangah, Falam khua ralkap sakhan in hriamnam ngan 120mm in CNDF lei ah voi 2 an kah. Pathian dawtnak thawngin hliam tongmi an um lo.

Uknak firtu Myanmar ralkap 250 cu Kalay peng, Chaungkhuah khua lei i Falam lei ah an rung kai. Var Hlei um ralkap sakhan ah 100 an taang i 150 cu Falam-Kalay lamkam um Parte khua lei ah nizaan ah an ṭum ṭhan.

Mah ruangah Parte khua, Lumbang khua le Falam-Kalay lam um khuami pawl cu ramtang ah an zaam dih hna.

Myanmar ralkap pawl cu Kalaymyo in a hung kaimi ralkap sinah fonh an i timh caah si men lai, tiah zumh asi.

Myanmar ralkap pawl Kalay peng in Falam pengah an hung kai caah Falam peng, Weibula khua pawng i khuate 8 khuami 2,873 cu a himnak hmun ah an zaam hna.

Weibula khua ah ralkap nih inn pakhat an duah.

Nizaan zongah CNDF nih ‘Myanmar ralkap 9 kan thah hna’ tiin thawng a thanh.

“Weibula lei in a rami Myanmar ralkap pawl cu January 14 dei lai 3pm hrawngah Hmunli khua le Var Sakhan kar ah CNDF nih kan hmenhmi bomb an i lamh i 5 an thi, tampi hliam an tong,” ati.

“January 15 ah Myanmar ralkap pawl cu Var Sakhan in an i thawh i Parte khua an phak lai 10am hrawngah CNDF he kan i kap. Zaanlei 5:30pm tiang kan i kap. Ralhrang 4 kan thah hna,” ati.

Atu lio cu ral a fah tuk caah mipi pawl, Falam – Kalay laam le Falam – Weibula lam ah khuatlawng hlah uh, ati.