Kawl Ralkap pawl nih Falam le Hakha kar um khuate tampi an khangh caah khuate 7 in minung 2,000 leng ralzaam dirhmun in ramtang an phan cang, tiah kan theih.

“Khuate 7 an zaam. An khua pawng ramtang ah an i thup hna. Thlanrawn, Taal, tbk cu an khuami dihlak in an zaam. Rialti khua lebang cu inn pakhat hmanh taang loin Kawl Ralkap nih an khangh dih. Atu hi an khua pawng ramtang ah an i thup ko. Ralzaam dihlak 2,000 hrawng an si lai,” tiah Falam ummi pakhat nih a chim.

Falam-Hakha lam ah ummi Lungpi/Lungrang, Zalai, Rialti, Thlanrawn (A) le (B), Taal, Tlangzar, tbk khuami pawl nih nunnak kawl in an inn an zaamtak dih hna.

Ralzaam pawl cu ramtang ah an i thuh caah eidin tirawl an harsa tuk hna. Ruahpi a sur peng fawn i ruahkham (muka) plastic, puan, tbk an herh tuk hna.

“Atu lawlawse cu anmah tein an i putmi rawl an ei rih. Hnu ahcun ei awk an ngei ti lai lo,” tiah a cunglei langhtermi nih a chim.

Kawl Ralkap 700 hrawng cu October 12 ahkhan motor 60 hrawng le tank 2 in Kalaymyo lei in Falam khua an phan. October 13 ah Hakha lei ah an lan.

Lampi ah ummi Rialti, Lungpi, Thlanrawn, Tlangzar, tbk inn an khangh, inn an baoh i an hmuhmi paoh an fir. Biakinn an khangh, an hrawh dih hna.

CNF, CDF le CNDF nih an kah hna i motor 16 an hrawhpiak hna. Ralkap 30 hrawng an thah hna i 40 hrawng an hliam hna.

Kawl Ralkap pawl cu motor 30 hrawngin nizaan ahkhan Ramthlo khua an phan i Baptist Biakinn le AG Biakinn ah an riak.