CNDF nih tu zingka ah Kawl ralkap 6 an thah hna. CNDF ralkap Salai Cung Nawl Piang nih ram le miphun caah a nunnak a pek ve.

CNDF (Chin National Defense Force) cu Falam peng mipi vengtu ralkap asi i Chinland Defense Force (CDF) he aa bawmmi asi. CDF-Falam ti zongin an auh.

Mawtaw 2 khat in Kalaymyo in Laitlang a kaimi Kawl ralkap cu Lumbang khua pawngah Falam pasalṭha pawl CNDF nih tu zingka 8am ah an kah hna.

Kawl ralkap 6 an thah hna pinah adang 2 an hliam hna.

Kanmah lei kan himnak hnga media nih thil sining tling tein langhter lo dingin kan in nawl hna, tiah CDF nih a thanh.

CNDF nih, “Chin National Defense Force chungtel Salai Cung Nawl Piang cu amah nih bia aa kam bantukin Chin ram le miphun himnak caah ral a do i May 21 ah a nunnak aa pe,” tiah a thanh.

“Miphun dothlennak caah aa pumpekmi cungah CNDF nih upatnak sangbik kan pek. Tantakmi chungkhar an ngaihchiatnak kan hrawmpi hna,” ati.

Tu zingka 10:50am ah Kawl ralkap pawl cu hriamnam ngan tampi he mawtaw 10 khat in Kalay in Laitlang lei an kai.