Tu zingka ah Kawl Ralkap tam taktak cu motor 6 le raltuknak tank 2 khat in Falam khua in Hakha khua lei ah an kal.
Sagaing ramṭhen, Kalaymyo in Kawl Ralkap tam taktak cu motor 50 le tank 2 khat in an hung kai i lam ah zaan 2 an riah hnu ah nizaan kha Falam khua an phan.
Magway ramṭhen, Pakokku le Kyaukhtu lei zongin Kawl Ralkap tam taktak cu motor le tank 88 khat in Chin state, Mindat khua lei ah an hung kai thluahmah.
Nithlakchaklei ramṭhen 3; Magway, Sagaing le Chin dothlennak ralkap hruaitu Chin National Front (CNF) headquarters Camp Victoria kah lak dingin a rami an si, tiah Kawl Ralkap a zaammi 2 nih an chim.
Camp Victoria sakhan cu Thantlang peng, Tlanglo khua taw i Tio tiva kam (Mizoram ramri pawng) ah a um.
Nizaan kha Kawl Ralkap pawl nih Mindat-Matupi lam minmi ṭheng in an remh cuahmah. Magway ramṭhen in a rami Kawl Ralkap pawl hi tuni hrawngah Mindat an phan lai i Matupi lei ah acheu hrawng an kalte men lai.
Hakha cu Matupi lei he Falam lei he an rat hnawh cuahmah tinak asi.
Kawl Ralkap nih Nitlakchaklei ramṭhen 3 i dothlennak ralkap pawl an hram bongh dingin ralkap 3,000 leng a thlah hna. Atu hi Sagaing le Magway cu an cil dih ngawt cang i Chin ram le CNF sakhan lak dingin an rat cuahmah lio asi.
Ref: Zalen, CHRO
