Facebook nih, “tu kum chungah fake account 5.4 billions hrawng kan thah i, ngakchia hremnak le mahlemah thahnawnnak an tarmi million tampi zong kan hlonh,” tiah Nithumni ahkhan a thanh.
“Tu kum April thla in September thla kar lawngah fake account 3.2 billions kan thah.
“Fake account ser a karh chin lengmang. Fake account an sermi pawl cu minutes tlawm pawl hnu ah kan thahpiak colh lengmang hna.
“Fake account an sermi pawl cu a si khawh chungin theih khawh le kham khawh kan i zuam. Fake account theihkhawhnak system kan sermi nih ni 1 ah fake account million tampi a kham khawh,” tiah Facebook nih a ti.
Mi hlennak, ahlei in ramkel miaknak le zatlang sining thlen duh in a dik lomi tarnak caah a phuphu in tuahmi fake account pawl cu Facebook nih asi khawh chungin thahpiak aa zuam.
Facebook nih fiang khitkhat tein report ca a chuahmi zoh tikah, cozah, ahlei in US cozah hrim nih Facebook account ngeitu pumpak konglam Facebook sinah a halmi a tamtuk.
Tu kum tanṭim tiang ah cozah nih Facebook sinah minung 128,617 accounts konglam a hal. Ni kum a halmi nakin 16% bak a tam deuh.
Facebook company sinah pumpak a account konglam a hal biktu cozah cu US asi. A changtu ah India, UK, Germany le France an si, tiah Facebook report ca chungah kan hmuh. — Channel News Asia le Reuters
