Tuzaan Myanmar Idol hlasak zuamnak ah hla lak aa palhmi Esther Dawt Chin Sung nih, “final a kaimi tu kut ka benghpiak ko cang hna lai,” tiah MC interview ah a chim.
Aa palhnak aruang an hal i “a hramthok ahkhan ka hnakhaw ah kaa bunhmi wireless earphones ah music an tummi fiang tein ka thei kho lo. ‘Ṭut, ṭut, ṭut’ ati i zei thawng hen si ka ti lio ah piano aw a rung lut i ka lak colh ka ti cu pingpalo a rak si dih,” tiah a chim.
Esther nih a chimmi bantuk hi wireless earphones ah a um pah tawnmi asi. Wireless earphones signal cu radio wave in a kalmi si caah minung tampi an umnak le phone tampi a umnak (phone signal tamtuk a umnak) ahcun signal mih lo a um pah tawn ṭheo — Wireless recorder le earphones a hmang balmi nih cun nan theih cio ko lai. Cun, wireless thilri a tlaitu daithlan ruang zongah asi kho.
Esther nih, “kha cu aho palh hmanh asi lo, mi tampi he tuahmi zong asi,” ati.
“Hla kan sak lio ahhin kan hnulei in wireless earphones a kan bunh. Radio wave pakhatkhat aa pah sual. Ka hnakhaw pahnih ningin a pit fawn i zeihmanh lenglei aw ka thei lo. Wireless earphones in aw pakhatkhat ka theih i ka lak tikah pingpalo a chuah kha si.
“Voi tampi kan cinhmi asi i hi cu palh bak lo dingmi asi caah ahohmanh na palh ti awk an ṭha lo. Hi cu a cangsualmi asi tiah ka ruah ko. Mah ruangah ka lungrawk tuk leemlo. Tuni tiang thazaang aa ka petu nan dihlak cungah ka lawm.
“Tuzaan cu ka vanchia ka ti ko lai ta. Zei khom si ah, thinphang lo le dai tein a dongh tiang aa ka sakter khotu Pathian cungah kaa lawm.
“Tuzaan thil a cangsualmi kong he pehtlai in nan dihlak hika hmun in ngaihthiam kan hal hna,” tiah a chim.
Atang video ah tling tein zoh ve.
