Esther Dawt Chin Sung cu Myanmar Idol ah a mitthli tla

Esther Dawt Chin Sung cu Myanmar Idol ah a mitthli tla

Awttha Esther Dawt Chin Sung cu atu lio Kawlram ah tuahmi Myanmar Idol Season 4 hlasak zuamnak ah aa zuam ve.

“Kanmah bantuk hlasak a zuam ttung i a chunmang a tling lomi hna caah Myanmar Idol hi chunmang tlinnak hmuntha a si tiin ka ruah,” tiah Esther Dawt Chin Sung nih a chim.

Esther cu Lady Gaga sakmi ‘Shallow’ hla a sa. Biakhiaktu Tin Zar Maw nih Kawl hla a sakter chap.

“Gaga he a lo loin na sak. Ni Ni he zong aa lo loin na sak khawh fawn. Na awmaang ttha. Na aw ka uar tuknak zawn tete an um. Ka lung na tling,” tiah biakhiaktu Phyu Phyu Kyaw Thein nih a chim.

“Na kokek aw a thlum, cun a tha tthawng. Key sang na sak tikah a puak i a ngaitu mipi lunghmuihnak na pek khawh. Biafang khat le khat na tan tik zongah a tluang.”

“Tlangcungmi na si ruangah na aw chuah cu a pei ko lai. Kan theihthiam ko. Thiltha lo cu si lo nain a that khawh chungin na zuam hau. Zuamnak a si ruangah, rian a ngan khun. Nangmah bantuk a aw tthami he hmunkhat nan i zuam tikah na awchuah pei mi kha an ca ah caanttha a si ding kan duh piak lo. Mah te kha i ralrin deuh law kan duh piak,” tiah biakhiaktu Tin Zar Maw nih a ti.

“Hlasak cu ka nunnak a si. Myanmar Idol cu ka chunmang nganpi a si na ti bantuk in hla na sak lio ah ka hmuh khawh. Nain 100% perfect si rih lo. Express a thatuk. Feeling le performance zong thatuk. Nain, pa khatkhat na herh,” tiah biakhiaktu Ko Aung Lat nih a ti.

Biakhiaktu pawl nih an hmuh ning an chim dih hnu ah a Esther cu an capo len. Esther cu an ka cohlang lo tiin a ruah caah a ngaihchia tuk i a tap. Nain, a hnu ah Golden Ticket an pek. A tanglei video ah tling deuh in zoh khawh a si.

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.