Nungak muidawh awṭha Esther Dawt Chin Sung nih zahan zaan i Myanmar Idol Season 4 Top 10 a kaimi kongah Pathian le vote petu mipi cungah lunglawmhnak a chim.
Cun, amah thapek ruah bakah Laitlang in ni 3 chung retheih tuar in Yangon a rami apa le a chungkhat pawl cungah aa lawmhnak a chim.
Esther Dawt Chin Sung: Bawipa na dawtnak cungah kaa lawm, lam ka hruai rih ko sawh
Keimah aa ka daw i thazaang pe dingin ka caah Laitlang in retheih tuar in a rami ka pa (a cungbik hmanthlak) le ka naule, cun min dawh tuk aa ka satu ka pu, ka ni le ka ṭang chungkhar cungah kaa lawm tuk.
Cun, thaba le caanpek tein a hmun ah thazaang a hung ka petu dawtu nan dihlak le ramchung ramleng in vote tampi aa ka petu dawtu nan dihlak le chungkhat nan dihlak cungah lunglawmhnak chim cawklo ka ngei.
Nan dihlak Pathian nih thluachuah in pe ko hna seh. Nan ka dawtnak hi kan cham kho hna lai lo. Pathian tu nih thluachuah bongmalza in pe ko hna seh, ati.
Biakhiaktu Tin Zar Maw nih, “ṭha tein hlasak a thiammi na si, aw phundang te na ngei i a theitu vialte lung a lak khawh, hi nakin a har deuhmi hla zong na sak khawh rih fawn, Top 11 kan thimmi lakah a kan ngaichih ter lotu pakhat na si ve,” a timi Esther cu Chin Idol 2017 ngahtu, awṭha hrimhrim asi.
Phyu Phyu Kyaw Thein zong nih, “hla dangdang na sak tikah aw dangdang tete na chuah, na sakmi hla hoih in na mood le aw phun dangdang in na chuah khawhmi hi na thiamnak asi,” ati.
Aung Ko Latt nih, “Esther na aw hi biakhiaktu 3 nih kan khansa dih. Tu zaan na sakmi a ṭha tuk hringhran,” ati.
Zahan zaan result an thanh lio zongah vote tambik ngahtu asi. Myanmar Idol Season 4 winner asi te lai, tiah a comment mi zong an tampi cang.
Hmai zarh Nilini zaan ah Top 10 pawl an i zuam ṭhan lai. Zuamnak a dih cangka in mipi nih vote an si ṭhan lai i Ningani zaan result thanh hlan tiang vote pek khawh an si lai.
Mipi vote in kai asi cang caah zeitluk a awṭhat zongah vote petu nan tlawm ahcun a tla kho. Mipi nan kut ah a um cang. A uartu nih cun vote pek tlolh bak lo ding.
