Dr. Sasa nih, “Kannih cu State pawl Komhmi Myanmar ram (မြန်မာပြည်ထောင်စု) kan si, aa lungrualmi Myanmar mipi kan si,” ati.
Shan le Rakhine hriamtlai phu 3:
- Myanmar National Democratic Alliance Army (MNDAA)
- Ta’ang National Liberation Army (TNLA) le
- Arakan/Rakhine Army (AA) nih “Myanmar ralkap nih buai lo tein sandahpiahmi mipi na thahmi hna i na ngol lo ahcun, mipi lei kan ṭang lai,” tiin cathanh an chuah.
Mah cathanh cu Dr. Sasa nih a tar i “United States of Myanmar (State pawl Komhmi Myanmar ram) kan si, aa lungrualmi Myanmar mipi kan si,” tiin a ṭial.
“Kan unau MNDAA, TNLA, AA nih tuksapur phungninglo ralkap cozah an ralchanh ṭhan caah ka nuam in ka lawm tuk.
“Phungninglo ralkap cozah nih kan mipi sin in democracy le luatnak a fir i sualnak ngei lo rammi cungah tuksapur thahnawnnak a tuah.
“Caan saupi chung fak tukin a tuarmi Myanmar mipi caah a dirmi, luatnak caah ral a domi kan unau hna cungah kaa lawm tuk.
“UN Security Council (UNSC) le Ramdang pawl nih lungrual tein United States of Myanmar (USM) ram mipi a kan dirkamh hrimhrim a herh. Myanmar mipi nuai 54 cungah ralhrang tuahsernak a tuahtu uknak firtu ralkap cozah hi, lungrual tein kan cawlcanghmi nih a tei lai.
“Ralkap hremuknak a sung lai, Federal Democracy nih a tei lai. Hi ralhrang tuahsernak hna hi an sung lai, dinnak nih a tei lai,” ati.
United States of Myanmar (USM)
Dr. Sasa nih ‘United States of Myanmar (USM)’ kan si a timi cu ‘State vialte mahte in aa uk dihmi ram (federal democratic union)’ a ti duhnak si. ‘United States of America (USA)’ he aa lo ngai.
‘United States of Myanmar (USM)’ a sullam cu – state 14; Chin state, Kachin state, Shan state, Yangon state/region, Mandalay state/region, tbk pawl cu anmah state chung ahcun anmah tein an i uk dih nain an dihlak komh in ram pakhat ah an dir, tinak asi. ‘Federal States of Myanmar‘ ti khawh zong asi.
Ralkap uknak le 2008 phunghram kan hrawh lai i “state vialte mah tein aa ukmi ram (federal democratic union)” kan dirh lai, kan ti lengmangmi kha a chim duhmi si.
‘United States of America (USA)’ zong cu mahte cio in aa ukmi state 50 komhmi ram, federal democracy ram asi.
