Dr. Sasa nih, “February 1 dei hlan ah ralkap nih uknak an fir lio kha Naypyitaw ah ka um lio si,” tiah Reuters media sinah a chim.

“2020 November thimnak ahkhan Chin tate ah NLD nih teinak an hmuh khawhnak hnga, mipi vote pek sawm ka bawmh hna.

“Aung San Suu Kyi party NLD nih cozah thar ah hmunhma sang rian pek an ka timh i Naypyitaw ah an ka auh caah Naypyitaw ah ka um lio si.

“Ralkap nih ka hngal hna hlah seh tiin taxi mong bantukin thil kaa hruk i ka zaam,” tiah a chim.

2020 November 8 thimnak ah teinak a hmumi MP pawl nih Myanmar UN Special Palai rian an pekmi Dr. Sasa nih, “Ralkap nih kan ram chuak vialte anmah caah an i lak dih. An tuahsernak hi tuksapur asi. Mipi an thah hramhram thluahmah hna.

“Kan i tinhmi ralkap uknak thlak le federam democracy ram kan phak hlan lo, zei tik hmanh ah hnulei kan kir lai lo,” ati.

Dr. Sasa cu atu lio Myanmar ralkap duhlo langhternak le ralkap uknak hrawhnak caah Myanmar mipi nih an i bochan bikmi pakhat asi ve.