Myanmar UN Special Palai Dr. Sasa nih, “Hi thahnawnnak hna hi, phungninglo ralkap cozah SAC nih, Myanmar mipi nih dimawkharesi ning tein anmah caah an thimmi Hluttaw sinah uknak a pek ṭhan lawngah a dong lai,” tiah a chim.
“Hi phungninglo ralkap cozah nih, buai lo tein sandahpiahmi hriamnam ngei lo mipi tlerh, tukvelh, thah, fahnak pek le temhtuar ter ti dah lo cu zeihmanh thil ṭha kan tuah khawhmi um lo ti kha tatte a langhter cang.
“Hi phungninglo ralkap SAC nih uknak a firmi cu a hlawhtling lo. Ram a hruai kho ti lo,” ati.
Myanmar mipi nih anmah caah an thimmi MP pawl cu February 1 ah Rampumpi Hluttaw (Pyidaungsu Hluttaw) ah rian ṭuan thok dingin biakamnak tuah an tim nain khuadei hlan ah ralkap nih a tlaih viar hna i uknak a chuh hna.
A luatmi MP pawl nih kanmah hi mipi nih an caah an thimmi kan si tiin “Rampumpi Hluttaw Aiawhtu Kawmiṭi (CRPH)” an dirh i mipi he i bawm in ralkap uknak an do. UN ah anmah aiawhtu dingah Dr. Sasa an thim.
Dr. Sasa nih a chimmi “mipi nih anmah caah an thimmi Hluttaw” a timi hi CRPH kha a chim duhmi asi. Cucaah tlangtar ah fiangko in CRPH kan tinak asi.
