Dr. Sasa nih, “Thawngpang ṭha. UN Security Council nih Myanmar kong meeting a tuah hlan ah atanglei ca hi UN Secretary General sinah kan kuat. New York um UK Mission sin zongah kan kuat,” ati.
UN Security Council nih tuni hi Myanmar kong lakhruak meeting a tuah lai.
Dr. Sasa nih cakuat in Myanmar kong hma lak ding a halmi 5 cu atanglei hna hi an si:
- Myanmar ralkap bawi lawng si loin ralkap company pawl le an tangka luhnak hrampi a simi zinaan le gas zong hi phihpiak hna
- Myanmar ralkap nih mipi thahnawnnak caah hriamnam tam chinchin an ngeihnak hnga lo, zei ram hmanh nih Myanmar ralkap hriamnam zuarh lo dingin nawl chuah
- A rannak in hartong bawmhnak hung pe hna, tlangcungmi hna state pawl i ramchung ralzaam pawl zong hi bawmhnak pe hna
- Myanmar ralkap nih rammi a thahnawnmi hna hi miphun cihmih, sualnak ngei lo mipi thah hramhram le ralram ah mipi thah case in Internatinal Criminal Court (ICC) ah tazacuai dingin hlathlainak tuah
- Miphun cihmih, ralram ah mipi thah le sualnak ngei lo rammi thahnak chungin Myanmar ralkap nih mipi a ven duh hna lomi cu zapi hmuh asi ko caah UN ralkap thlah (R2P) dingin kan ruahpiak.
Dr. Sasa nih ca a kuatmi ahcun, “UN Security Council nih cun Myanmar kong hma lak dingin kan halmi hi hma lak dingin bia a khiak lai lo ti kan zumh, mah ruang cun vote thlak dingin kan tuahpiak,” tiah a hal.
UN Security Council (UNSC) ahcun member ram 15 an um i ram 5; China, Russia, US, France le UK hi caantling member an si caah anmah 5 lakah pakhatkhat nih a duh lomi paoh cu a taangmi ram 14 nih an duh zongah tuah a ngah lo.
Hiti ning cun UNSC nih zeihmanh tuah khawh ding asi lo caah, Phunghram dal 27 ah “procedural vote” timi phungphai an tuah. Procedural vote an thlak ahcun caantling member a si lomi ram 10 lakah ram 9 nih “Yes” an ti ahcun UNSC nih pom asi, caantling member nih hnon khawh asi lo.
