15.9 C
Hakha
Thursday, September 23, 2021
- Advertisement -

Ṭial Tharmi

Dr Sasa nih UN biachahmi kong fiang takin BBC ah a chim

NUG cozah biachimtu Dr Sasa cu London hrambunh BBC media nih, “UN biachahmi hi zeitin dah na ruah?” tiah a hal.

Dr Sasa nih, “‘Myanmar ralkap nih uknak an firmi cu zeitik hmanh ah kan cohlang lai lo’ tiin vawleicung ram 119 nih fiang tuk le thang tuk in an langhter,” tiah a leh.

“Ralkap nih uknak nan firmi hi cohlan khawh asi lo, an ti. Ramkhel ruangah nan tlaihmi vialte thlah dih hna uh, an ti. Myanmar ralkap sinah hriamnam zuar lo ding, an ti.

“Myanmar ralkap zong nih ramdang ruahning hi ṭha tein a ngaih ding le uknak ngeitu Myanmar mipi sinah uknak a pek ṭhan awk asi cang,” ati.

BBC nih, “China le Russia nih Myanmar ralkap bawi pawl dantat an duh hna lo sikaw, anmah telpi lo cun UN nih zei pipa a tuah kho lai maw?” tiah a hal chap.

Dr Sasa nih, “Hi biachahnak ah China le Russia an i tel duh lomi kan hmuh, nain UN le UN Security Council nih an tuah khawhmi um ti lo tinak asi lo.

“UN, UN Security Council le ramdang pawl nih uknak firtu ralkap bawi pawl hi fak deuh in dan an tat rih hna a hau.

“Myanmar ah hriamnam zuar an khammi hi cu biachahnak hme tuk asi kan ti khawh ko, nain ram tampi nih mah biachahnak an pommi nih hin ‘ramdang pawl nih zei tik hmanh ah an kan cohlang lai lo’ ti kha fiang tukin Myanmar ralkap a theihter hna.

“China le Russia nih cun Myanmar ram a daih ding hi an duhmi asi. Nain, daihnak cu buainak a dongh tik lawngah a um kho. Democracy a um tik le tluang tein mipi sinah uknak an pek ṭhan tik lawngah daihnak cu a um kho lai,” ati.

BBC nih, “Mah daihnak nan hmuh khawhnak ding ahcun nanmah zong nih ralkap bawi pawl he i chawnhbiak nan duh ve a hau lai cu?” tiah a hal.

Dr Sasa nih, “Biaruahnak tuah dingin timhcia kan si ko, nain biaruahnak tuah khawhnak ding ahcun ralkap nih a tlinh hmasa hau. Myanmar mipi tukvelh le thahnawn a ngol hau, cun ramkhel thongtla pawl a thlah hna hau. Mipi tukvelh le thahnawn a ngol lo buin biaruahnak tuah cu kan caah sullam ngei lo,” ati.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -