“Chin state, Mindat ral kong hi a rannak in hma kan lakpiak uh,” tiin NUG cozah biachimtu Dr Sasa nih UN Security Council le British cozah ca a kuat hna.
Dr. Sasa nih, “Mindat, Chin state le Myanmar rampumpi caah kan si khawh chungin kan cawlcang cuahmah ko.
“Hi lainawng ralhrang SAC hi miralṭha Myanmar mipi nih kan tei khawhnak hnga, keimah pumpak zong suimilaam 1 te hmanh din loin rian ka ṭuan peng ve. Thla kan campiak cio uh,” ati.
Cakuat chung ahcun, “Ralkap nih bomb, miakpi, tank le helicopter in Mindat khuami minung 50,000 hrawng fak tukin a kah hna,” ati.
“Helicopter, miakpi le tank tiangin ralkap nih Mindat khua a kah caah liamcia suimilaam 48 chungah minung 5 leng a thah hna i 14 a hliam hna. Inn zong tampi a hrawh hna.
“Ralkap nih hi tluk fakin Mindat khua a kahmi hi Chin state le Myanmar rampumpi mipi vialte nih kan ṭih hna seh ti a duh ca zongah asi kho.
“Hi tuksapur uknak hi donghter thai cikcek dingin ramdang nih Myanmar mipi nan kan ṭanpi hrimhrim a herh. NUG hi Myanmar cozah dik asi tiin ramdang nih nan kan cohlan colh lo ahcun ramchung ralpi a tho khomi si.
“British cozah le UN Security Council nih atanglei langhtermi hi kan tuahpiak uh:
- Ralkap hi Mindat khua a tukmi ngol dingin kan chimhpiak uh
- Ralkap sipuaizi vialte phit dih uh. Zinaan le gas sipuaizi zong phit dih uh
- NUG cozah kan cohlang uh
- Ramdang vialte zong cu bantukin tuah dinging kan forhfial piak hna uh,” ati.
