CPRH nih Myanmar UN Special Palai rian a pekmi Dr. Sasa le Rohingya hruaitu pawl cu tuni ah online in meeting an tuah i “ralkap nih Rohingya cungah an tuahsernak cu an zun hrimhrim lai” tiah Dr. Sasa nih a kamh hna.
Meeting an tuahmi kong cu “vawlei cung ramkip um Rohingya hruaitu pawl he a biapi tukmi meeting kan tuah” tiah Dr. Sasa nih a FB page ah a tar.
“February 1 thokin hriamnam ngei lo rammi 300 deng a thattu ralkap bawi pawl kuttang ah caan saupi chung fak piin a tuarmi kan unau Rohingya pawl caah, hi Rohingya hruaitu pawl he i bawm in thil dik kan chuahter lai.
“Mah ralkap bawi pawl hi Myanmar mipi a runrun in an thah hramhrammi hna le inn an duah piakmi hna theipar kan zunter khawh hna hlan lo, kan i din lai lo,” ati.
Nizaan ah Bangladesh ram Cox’s Bazar peng um Rohingya ralzaam khua a kanghmi kong zongah Dr. Sasa nih a ngaihchiatnak a langhter.
“Mah thawngpang ka theih cu ka ngaihchia tuk hringhran. Tantakmi chungkhar dihlak nan ngaihchiatnak kan hrawmpi hna. Nan ram (Myanmar) ah kir in kanmah he dai tein um ṭi lai ni kai hngah hlang” ati.
2017 ah Rakhine state ah Myanmar ralkap nih Rohingya pawl a tlaih, tlaihhrem, hrem, tukvelh, thah i inn a duahpiak hna caah minung ting 7 leng (730,0000 hrawng) cu nunnak kawl in ramri um Bangladesh ram Cox’s Bazar pengah an zaam. Nihin tiang an kir kho rih lo.
Mah ruangah muslim ram pawl nih Myanmar ralkap cu Netherlands ram The Hague khuapi um Vawlei Biaceihzung (ICJ) ah ‘miphun cihmih’ case in taza an cuai.
Nain, democracy nucan tiin ruah i Nobel daihnak laksawng tiang pekmi Pi Aung San Suu Kyi nih Myanmar ralkap cu ‘Rohingya miphun cihmihnak an tuah lo’ tiin ICJ ah a phehpiak hna.
Mirang nih Kawlram an rak uk lio khahlan pipu chan in Myanmar ram Rakhine state ah chan tampi a um cangmi Rohingya pawl cu 2017 in atutiang kum 4 chung Bangladesh ram an i dor chungah fa a ngeimi an tampi ve i atu cu Bangladesh ram ah ting 10 hrawng an si cang lai tiah zumh asi.
“Bangladesh ram ah hitin hmailei ruahchannak ngei loin um peng cu asi kho lo. Rian zong kan ṭuan kho lo i rawl zong ṭhaṭhi kan ngei lo. Kan fale hmailei ca zongah asi kho lo …” tiin Rohingya tampi cu rili cungah tilawng chia tete in Malaysia le Indonesia ram lei an panh i rili cungah thla 3 chung hna an vaih caah rawlṭam in minung tampi an thi. Cheukhat cu an tilawng aa let in minung tampi an thi.
Malaysia le Indonesia a phan khomi tampi zong an phaknak ram cozah nih an tlaih hna i thong an thlak ṭhan hna. Anmah dirhmun i siter ahcun tuar a har ko. “Chuahchan ngei lo, nunchan ngei lo” dirhmun ah an um.
An thawngpang a theimi paoh nih an celh cio lo.
