Myanmar UN Special Palai Dr. Sasa cu miphun hriamtlai ngan ngai a simi Karen hriamtlai phu KNU hruaitu hna hi nizaan March 5 zaan ah online in meeting an tuah.
Dr. Sasa nih, “KNU Vice Chairman Padoh Saw Kwe Htoo Win, General Secretary Padoh Saw Tah Doh Moo le Assistant to Vice Chairman Nimrod Andrew he meeting kan tuah,” tiah Dr. Sasa nih a thanh.
“Atu lio Myanmar boruak hi zeitin hma kan lak ah dah ṭhat lai timi kan ceih. Kan ram boruak hi ramdang nih a kan bawmh deuhnak hnga nuhrin covo lei in siseh, ramkhel le ramdang cozah pehtlaihnak lei zongin zeitin dah rian kan ṭuanṭi lai ti pawl kan ceih,” tiah General Secretary Padoh Saw Tah Doh Moo nih RFA sinah a chim.
“Atu dirhmun hin federal rampi ser dingin i timhtuah kan hau. Mah dirhmun phaknak caah zeitin dah rian kan ṭuanṭi hna lai ti bantuk pawl kan ceih,” ati.
Ralkap uknak hi ramdang he i bawm in kan hrawh dih cikcek lai, tiah KNU ralkapa brigade 5nk nih cathanh a chuah colh.
KNU cu miphun hriamtlai phu ṭhawngṭha ngai asi. Ralkap nih uknak a fir cangka in fakpi in a duhlonak cathanh a chuah colh. Ralkap uknak duh lo ruangah a zaammi Myanmar ralkap pawl zongah anmah sinah a umter hna, a bawmh hna.
