Dr Sasa nih tunai ah NUG cozah cathanh chuahmi aa share i “Kan unau Rohingya pawl caah thil dik chuahpi dingin vawlei biaceihzung sangbik International Court of Justice (ICJ) he kan ṭuanṭi cuahmah,” tiah a ṭial.
“Tuksapur Myanmar ralkap bawi pawl uknak tangah caan sau tuk chung fak tukin a tuar cangmi kan unau Rohingya pawl le miphun dihlak caah thil dik chuahpi dingin ICJ he rian kan ṭuanṭi cuahmah. Hmun khat ah, mah tuksapur uknak hi kan donghter thai lai,” ati.
NUG cozah nih cathanh a chuahmi ahcun, “Kum 2016-2017 ah Bangladesh ah a zaammi Rohingya pawl harsatnak kong ahhin kan lungrethei tuk. Vawlei biaceihzung sangbik ICJ he ṭuanṭi dingin a herhmi paoh NUG nih kan tuah cuahmah,” ati.
“NUG cu upadi ning tein thimmi Myanmar cozah kan si bantukin, ICJ ah pehzulh tein Rohingya dirpi le ICJ caan rikhiahmi zulh hi kan rian asi ve,” ati.
Myanmar ralkap nih Rohingya pawl an thah dawi hna ruangah, muslim ram 57 i funtomnak bu Organization of Islamic Cooperation (OIC) aiawh in Gambia ram nih UN biaceihzung ICJ ah Myanmar cu ‘Rohingya miphun cihmih case’ in taza a rak cuai.
Suu Kyi nih, “Kan ram ah Rohingya miphun cihmihnak a um lo (Ralkap nih Rohingya miphun cihmihnak an tuah lo),” tiin ICJ ah a rak chim.
Ramchung ramleng Myanmar mipi nih “Suu Kyi kan dirpi (We Stand with Suu Kyi)” tiin sandah kan rak piah hna.
Atu ah Suu Kyi cu ralkap nih an tlaih i ramdang bawmhnak kan herh cang caah Suu Kyi party dirhmi NUG cozah nih “Kan unau Rohingya kan dirpi hna, an caah thil dik chuahpi dingin ICJ ah ralkap taza kan cuai lai…” ati than i Myanmar mipi nih “A dik …” kan ti than.
Rohingya pawl hi kanmah miaknak caah hriamnam hman in kan hman hna. Kan inn saknak caah sobul bantukin kan hman hna i aa dawhcah lo ngai.
Suu Kyi nih Rohingya dirpi hna loin ralkap a rak dirpi mi hna kha aa palh tuk, atu cun Myanmar mipi dihlak zong lamping ah a kan hruai bantuk ah a cang.
