NUG cozah biachimtu Dr. Sasa nih tuni ah “ASEAN nih lainawng pa Min Aung Hlaing meeting nan sawmmi hi kan ram ṭhatnak caah santlai lo” tiin cathanh a chuah.
“Myanmar buainak daihternak caah santlai mi meeting cu kan cohlan ko, nain lainawng lutlai Min Aung Hlaing telh riangmang in Myanmar mipi telh lomi meeting cu santlai lo.
“Myanmar mipi aiawhtu taktak a simi Rammi Lungrualnak Cozah (NUG) hi Myanmar kong ASEAN meeting paoh kai dingin timhcia kan si. Tu hnu suimilaam 24 hlan ah thok ding April 24 meeting zong kai dingin timhcia kan si (kan kaiter ve uh).
“Atanglei langhtermi pawl hi a tuah lo ahcun, phungninglo ralkap cozah cu Myanmar kong meeting ah telh awk asi lo:
(1) Mipi thah ngol seh. Uknak a fir hnu in mipi 740 leng a thah cang hna i ni fatin a thahmi an karh peng.
(2) Sang le veng ah timh ciammaam tein thahnawnnak a tuahmi hi ngol sehlaw duhpaoh in mipi inn a kahmi hi ngol seh, mah ruangah nu le ngakchia le pumtlamtlinglo telh in rammi tam tuk an thi cang.
(3) Khuate pawl ah vanlawng in bomb thlak le miakpi in kah ngol seh, mah ruangah mipi tamtuk an thi cang i mipi thongsawm tampi umnak ngei loin an vai cang, tbk 6 a langhter.
