Dr. Sasa: April thla ah Federal Democracy Phunghram thar le Caankarlak Cozah kan ser lai

Myanmar UN Special Palai Dr. Sasa nih, “April thla thok ah ‘mipi duhning in mah tein aa ukmi state/region vialte komhmi ram (democratic federal union)’ dirhnak caah phunghram thar le Caankarlak Cozah kan ser lai,” tiah a chim.

A fiang rih lomi um aikun – ‘Federal’ a sullam cu Chin state, Mandalay region, tbk. state le region vialte kha anmah state/region chung kong ahcun anmah (state/region cozah) nih nawl an ngeih dih lai. Naypyitaw nih cutin/khatin tiah a uk kho hna lai lo. Sinain Myanmar rampumpi kong ahcun Naypyitaw nih nawl a ngeih lai.

Phun dangin chim ahcun, Chin state chung ngandamnak (sizung), sianginn, innlo, sipuaizi, ṭhanchonak, tirawl, lamsul, palek, pehtlaihnak, biaceihnak, tbk. vialte kha Chin state cozah nih bia a chah dih lai — Atu cu mah vialte hi Naypyitaw nih a uk dih. Chin state cozah nih Naypyitaw ah nawl a hal hmasa i ‘Yes’ ati lawngah a tuah. Kanmah tein kan i uk lo. Kan vawlei hmanh a lam huaha lomi le a hmu huaha lomi Naypyitaw ṭhumi nih a kan uk. Mah ruangah kan pale hna nih “kanmah tein i uk kan duh” an ti lengmangmi hi si. Ramkhel zeihmanh a hngal lomi ralkap pawl nih “Myanmar ram in chuah an duh” tiin an kan ruah.

Chin state kanmah tein kan uk lai nain Myanmar ram kan si lai. Tahchunnak ah, US hi democratic federal uknak a hmangmi ram asi. US state vialte khi anmah tein an i uk dih. Indiana state inn hmun, inn sak, sianginn, tbk. vialte Indiana cozah nih a uk dih i central/bahu cozah (Washington/Naypyitaw) aa thlak lo.

Democracy (Democratic) a sullam cu ‘mipi nih anmah caah an thimmi cozah’ tinak asi. Mah cozah cu an duh ti lo ahcun hnu thimnak (next election) ah midang an thim khawh hna. Cucaah cozah nih asi khawh chungin mipi duhmi thil ṭha tuah aa zuam i mipi caah a ṭha. A tawinak cun ‘mipi nih ukmi silole mipi duhning in ukmi’ tinak asi.

Atu bantukin mipi thim lo, mah nawl in Min Aung Hlaing te pawl nih uknak an firmi hi democracy asi lo. Mipi caah thil ṭha a chuah lo pinah amah rumnak caah mipi a hrem, tlaih, thah thluahmah hna.

Cucaah, ‘democratic federal union’ cu ‘mipi duhning in mah tein aa ukmi state vialte komhmi ram’ ti khawh asi.

Caankarlak Cozah cu amin nih a fianter ngai ko. Atu bantukin cozah a rawh tikah lakhruak in dirhmi kha asi. Cozah thar a um ṭhan hlan chung ca lawng asi. Hnu ah cozah taktak nih thlen ding asi caah “caankarlak” an tinak si. Interim Government silole Provisional Government silole Emergency Government tiah mahle siarem ning paoh in auh khawh asi.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...