8.2 C
Hakha
Tuesday, December 10, 2019
More

    Dr. Sa Sa nih UK Siangpahrangnu Fapa Prince Charles a ton than

    Follow Us

    99,417FansLike
    260SubscribersSubscribe

    Ṭial Tharmi

    - Advertisement -

    United Kingdom: Dr. Sa Sa le UK Siangpahrangnu Elizabeth II i a fapa Prince Charles (The Prince of Wales) cu November 5, 2019 ah London khualipi um St James’s Siangpahrang Inn i Clarence House ah anmah 2 te lawngin tonbiaruahnak an ngei.

    Liamcia caan zongah aa rak tong bal cangmi an si.

    Dr Sa Sa nih, “Myanmar ram i Chin state khuate fa nih The Prince of Wales ton ding cu asi kho lomi alo,” tiah an i tonmi aa lawmhnak kong a chim.

    “Ka min tein aa ka theih ding le hawikom bantukin dawtnak le zawnruahnak he aa ka ton ding lebang khi cu asi kho lo chinchin ding alo.

    “The Prince of Wales nih zeitin dah ka kong a theih khawh? Zeitin dah ‘ka miphun caah ka tuah cuahmahmi’ a siaherhnak kong a chim khawh?

    Dr Sa Sa le Prince Charles, The Prince of Wales

    “Ka ton khawh ṭhanmi le a hawi ah aa ka ruahmi cu kaa lawm tuk hringhran.

    “Lam hlapi ah kan um ko buin, The Prince of Wales nih ka mi hna le kan ram caah dawtnak a ngeihmi nih hin ka khuaruah aa ka harter ṭhan lengmang.

    “Prince nih ka ruahning lengpi in thazaang aa ka pek, a hmurka thlum, a dawtnak le ṭanpinak hna cu ka nunnak ah a caam zungzal ko lai. Cun thilṭha kan tuah cuahmahmi zong zei tik hmanh ah lungṭhul lo dingin thazaang aa ka pek,” tiah Dr Sa Sa nih a chim.

    Armenia ram ah sibawi degree a ngahmi Dr Sa Sa cu sizung le clinic a rak um lonak lam hla Chin state khuate pawl ah mizaw bawm dingin Ngandamnak le Ruahchannak (Health & Hope) NGO a dirhtu asi.

    Mirang nu nih Lailenpi khua ah mizaw a zoh hna lio. Dr Sa Sa tawlrelnak in Chin state mizaw zoh aa rak thawhmi asi.

    Health and Hope team nih Chin state khuate tampi in minung tlawmpal cio cu Mizoram ah an rak auh hna i mizaw zohkhenh ning an chimh hna hnu ah a herhmi sii zong an ronh hna i an khua cio ah an thlah hna. Atutiang mah rian cu an ṭuan peng.

    Chin state khuate ah chungtlik zawtnak in naupawi le ngakchia tampi an rak thih caah cu bantuk thihnak chungin kan luat khawhnak hnga i ruahchan in Health and Hope cu a rak dirhmi asi.

    Chin state mautam ruangah khua tampi rawl ei awk ngei loin an rak paam lio liamcia caan lio zongah ramdangmi sinah bawmh a rak hal i khua tampi facang tun tampi a bawmh hna.

    Tu zarh ah Lailenpi khua ah mizaw zohkhenh ning cawnpiak dingin zaanghleicawi Mirang 3 an rung phan.

    Lailenpi khua ah a chuakmi Dr Sa Sa cu Pathian thawngtha chim in Chin state khuate tampi a rak cultu Evan Abi fapa asi.

    Chin miphun caah thil ṭha tampi a tuah caah Chinland Yahoo Group upa pawl nih Chin Person of The Year 2014 zong an rak pek.

    Lailenpi Airport an sak liomi design

    Mawtaw lam a chiat tuk caah zawtfah caan ah sizung phak khawh asi lo caah Dr Sa Sa nih ramdangmi sinah bawmh a hal i atu hi Lailenpi khua ah airport an sak cuahmah liopi asi.

    Hmai kum 2020 May thla ah onnak puai an tuah lai i vanlawng a zuang cang lai.

    David Lah nih Dr Sa Sa kong a chimmi video

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.